У тэлеграм-канале БелТА з’явілася спасылка на аўстрыйскі тэлеканал AUF1. Аўтары паведамлення падаюць гэтую крыніцу як незалежны погляд заходняй прэсы. І калі там усхваляюць заслугі Лукашэнкі — то вось жа ён, «парастак справядлівасці сярод поля хлусні брудных заходніх СМІ». Рэдакцыя motolko.help вырашыла даведацца больш пра гэты тэлеканал.
Аўстрыйскі тэлеканал AUF1 упершыню выйшаў у эфір 31 мая 2021 года. З самага пачатку ён падаваў сябе як незалежны СМІ без цэнзуры («альтэрнатыўны погляд»). Заснаваў яго Стэфан Магнэт — паслядоўнік неанацысцкай ідэалогіі, які на канале выконвае ролю галоўнага рэдактара.
Раней Магнэт працаваў (ці працуе да гэтага часу) яшчэ ў адным правым экстрэмісцкім выданні Wochenblick. Выданне гэта неаднаразова абвінавачвалі ў распаўсюдзе дэзінфармацыі пра COVID-19 і вакцынах. Да прыкладу, яны публікавалі інфармацыю пра тое, што ў Ізраілі 70% цяжкіх выпадкаў COVID-19 у цалкам вакцынаваных.
Wochenblick вінавацяць і ў цесных сувязях з правай папулісцкай партыяй FPÖ. Партыю гэтую, дарэчы, таксама папракаюць у датычнасці да правага экстрэмізму і нацызму. Блізкасць новага тэлеканала да Wochenblick пацверджвае і тое, што яго галоўрэд Эльза Мітмансгрубер зараз працуе і на AUF1. Там яна вядзе праграму з гасцямі, якія выступаюць супраць мер барацьбы з пандэміяй.
Нягледзячы на сваю маладосць, AUF1 ужо паспеў праславіцца поўнай навуковай няграматнасцю ў сваіх праграмах. Да прыкладу, яны адмаўляюць глабальнае пацяпленне. А калі спрачаюцца пра небяспеку COVID, натуральна, шукаюць у пандэміі «след ідэалагічнай змовы».
Акрамя сувязі з прапагандай і неанацыстамі, варта згадаць, што канал закупіў ботаў ў Telegram і з пачатку чэрвеня ўжо набіў сабе 92 500 падпісчыкаў. Гэта ўнікальны рост аўдыторыі для невядомага канала.
Нягледзячы на тое, што рэдакцыя motolko.help толькі троху даведалася пра аўстрыйскі тэлеканал AUF1, гэтага падобна да энцыклапедыі інструментара расійскай прапаганды.
Гэтак жа мы звярнулі ўвагу, што БелТА перыядычна цытавала аўстрыйскае выданне Wochenblick у матэрыялах, якія тычацца пандэміі.
