На русском языке:
Компания Дмитрия Баскова хочет построить под Минском жилой квартал вместо ТРЦ, мотеля и СТО
На ўчастку пад Мінскам, дзе першапачаткова планавалася ўзвядзенне ГЗЦ, матэля і іншых аб’ектаў, могуць пабудаваць жылы квартал. Падрадчык – кампанія, доля ў якой належыць Дзмітрыю Баскаву і якая раней пабудавала пасёлак, дзе некалькі гадоў былі праблемы з камунікацыямі.
Кампанія ТАА «Рэторсія Трэйд» некалькі гадоў таму атрымала ўчастак пад забудову паміж МКАДам і вёскай Тарасава. У 2018 годзе долю ў кампаніі атрымалі Дзмітрый Баскаў і Андрэй Якімчык, з тых часоў праект сур’ёзна «збяднеў» і цяпер на тэрыторыі плануюць узвесці жылы квартал з нізкай, сярэдняй і шматпавярховай забудовай.
Першапачаткова ў планах быў забаўляльны цэнтр на 2000 кв. м., матэль плошчай 1657 кв. м., станцыя тэхнічнага абслугоўвання ў 2526 кв. м. і магазін са складамі агульнай плошчай 14605 кв. м. – гэтага ва ўзгодненых указам Лукашэнкі дакументах цяпер няма.
Узнікаюць пытанні да дамоў, якія плануюць узвесці. У пачатку 10-х ТАА «Рэторсія Трэйд» ужо пабудавала пад Тарасава таўнхаусны комплекс «Дабрадзеева», да якога ў жыхароў было шмат прэтэнзій па якасці будаўніцтва, падключэння да сетак водазабеспячэння і каналізацыі.
Падрадчык не ўвёў інжынерныя сеткі ў эксплуатацыю. У жыхароў 128 дамоў здараліся пастаянныя скокі электрычнасці, з-за чаго не раз згаралі бытавыя прыборы, былі праблемы з вадаправодам і каналізацыяй. У людзей некалькі месяцаў не працавала вулічнае асвятленне па ўсім пасёлку.
Каб вырашыць праблему, жыхары вымушаныя былі паліць вогнішчы ўздоўж дарог, каб хоць неяк асвятліць вуліцы. Усё гэта адбывалася ў элітным жылым квартале.
Учора, 25 чэрвеня, на сайце Мінрайвыканкама з’явілася паведамленне аб правядзенні грамадскага абмеркавання аб змене / развіцці генплана в.Тарасава. Яно пройдзе з 6 па 30 ліпеня, але мяркуючы па ўсім, у электронным фармаце.
Каб правесці адкрытае афлайн-абмеркаванне праекта, можна падаць заяву аб неабходнасці правядзення адкрытых грамадскіх абмеркаванняў праекта, даслаўшы заяву ў Ждановіцкі сельскі выканаўчы камітэт па адрасе [email protected] і ў Мінрайвыканкам па адрасе [email protected].
