На русском языке:
Колесникова хочет сделать из «Володарки» культурный хаб и музей репрессий
Пра гэта яна распавяла свайму бацьку падчас учорашняй «сустрэчы» ў СІЗА, паведамляе тэлеграм-канал Віктара Бабарыкі. Марыя падрыхтавала праект і распавяла, як яна бачыць Пішчалаўскі замак на Валадарскага, 2 у будучыні.
Асноўнае месца ў праекце займае культурны хаб з музеем ахвяр рэпрэсій, у тым ліку ахвяр камунізму. Гэта будзе музей скульптур пад адкрытым небам і архівам унутры замка.
«У яе вельмі шмат ідэй і яна марыць усё гэта ўвасобіць у жыццё», – распавёў бацька Марыі Аляксандр Калеснікаў пасля сустрэчы ў СІЗА.
Пішчалаўскі замак або СІЗА-1 на Валадарскага размешчана ў цэнтры Мінска і з’яўляецца помнікам архітэктуры. «Валадарка» з’яўляецца адзінай папраўчай установай у Еўропе, дзе прыводзіцца ў выкананне смяротнае пакаранне. Зараз у СІЗА-1 знаходзіцца 116 палітвязняў – больш, чым у любой іншай папраўчай установе Беларусі. Марыя Калеснікава знаходзіцца там са студзеня 2021, туды яе перавялі з ізалятара ў Жодзіне.
8 верасня 2020 года Марыя Калеснікава была затрыманая на мяжы з Украінай, праз суткі пасля таго, як перастала адказваць на званкі. Пазней высветлілася, што сілавікі спрабавалі вывезці яе з краіны, але на мяжы яна парвала свой пашпарт. Да таго, як стаць адной з лідарак беларускай апазіцыі, Калеснікава была прафесійнай флейтысткай і арт-дырэктаркай культурнага хаба Ok16 на вуліцы Кастрычніцкай у Мінску.
