In English:
Lithuania may close two more border crossings with Belarus
На русском языке:
Литва может закрыть ещё два погранперехода с Беларусью
Міністр унутраных спраў Літвы Агне Білатайтэ паведаміла, што МУС краіны найбліжэйшым часам афіцыйна накіруе ўраду прапанову аб закрыцці яшчэ двух пунктаў пропуску на мяжы з Беларуссю.
«МУС прапануе закрыць яшчэ два пункты. Гэта памежныя пункты Лаварышкес і Райгардас», – сказала Агне Білатайтэ.
Калі будуць зачыненыя «Прывалка»-«Райгардас» і «Катлоўка»-«Лаварышкес», то на беларуска-літоўскай мяжы застануцца ўсяго два памежныя пераходы:
- «Каменны Лог»-«Медзінінкай»,
- «Беняконі»-«Шальчынінкай».
Акрамя таго, міністр унутраных спраў і адміністрацыі Польшчы Марыюш Каміньскі заявіў, што ў выпадку крытычнага інцыдэнту, мяжу з Беларуссю закрыюць адразу Польшча, Літва і Латвія.
«Калі дойдзе да крытычнага інцыдэнту, незалежна ад таго, ці будзе гэта мяжа польская, літоўская ці латвійская, мы неадкладна распачнем дзеянні ў адказ. Будуць зачыненыя ўсе памежныя пераходы, якія пакуль адчыненыя, роўна як грузавыя, так і пасажырскія. Рэжым Лукашэнкі багацее на таварным транзіце, які праходзіць па тэрыторыі Беларусі. Усе пераходы будуць зачыненыя», – сказаў Каміньскі.
Білатайтэ пацвярджае, што краіны дамовіліся аб агульнай рэакцыі ў выпадку фіксацыі крытычных інцыдэнтаў.
Паводле яе слоў, ёсць 2 агульныя крытэры для прыняцця такога рашэння:
- Узброены інцыдэнт або інцыдэнты ля мяжы адной з краін.
«Ён павінен быць такім, які ўяўляе сур’ёзную пагрозу нацыянальнай бяспецы краін».
- Арганізаваны масавы прарыў мігрантаў.
«Калі будзе зафіксаваны адзін з такіх інцыдэнтаў, то пройдзе аператыўны абмен інфармацыяй паміж нашымі службамі, і тады будзе прынята рашэнне на ўзроўні ўрадаў», – сказала Білатайтэ.
