На русском языке:
Пропаганда со ссылкой на слова Лукашенко подтвердила диверсию в Мачулищах
Прапаганда са спасылкай на словы Лукашэнкі заяўляе пра затрыманне ў Беларусі, цытата: «тэрарыста ўкраінскіх спецслужбаў і ягоных памагатых, якія маюць дачыненне да спробы дыверсіі ў дачыненні да самалёта А-50 на аэрадроме «Мачулішчы».
Характэрна, што такім чынам Лукашэнка пацвердзіў, што на аэрадроме «Мачулішчы» была спроба дыверсіі з атакай на ДРЛА А-50У ПКС РФ. Да гэтага прапаганда ўсяляк адмаўляла інцыдэнт і стала заяўляла, што з самалётам усё ў парадку і нічога не адбылося.
У прыватнасці, экс-прэзідэнт Беларусі заявіў, што СБУ і ЦРУ «распрацоўваюць аперацыю супраць Рэспублікі Беларусь». Паводле легенды Лукашэнкі, «тэрарыст» – гэта нібыта расеец з расейскім і ўкраінскім пашпартам, які нарадзіўся ў Крывым Рогу і жыў у Крыме. «Ён быў завербаваны спецслужбай Украіны ў 2014 годзе. Айцішнік або добра разбіраецца ў IT-тэхналогіях. Рыхтаваўся для здзяйснення тэрарыстычных актаў», – падзяліўся фантазіямі Лукашэнка.
Па старой традыцыі Лукашэнка прыплёў да тэракту і Расею, каб паказаць, быццам ён у адной лодцы з Пуціным:
«Тэракт супраць расейскіх самалётаў у Энгельсе быў здзейснены некалькі месяцаў таму. Знятыя з космасу вынікі тэракту мы ўбачылі. Пашкоджаныя расейскія самалёты стратэгічнага прызначэння. Гэта было даручана не яму. Гэта было даручана іншым групам, якія былі старанна падрыхтаваны разам з нашым так званым тэрарыстам на тэрыторыі Украіны».
Таксама экс-прэзідэнт пахваліў тых, хто правёў дыверсію:
«Тое, што мы ўбачылі, рэалізуючы аперацыю ў Беларусі, – гэта сапраўды было нешта неверагоднае. Былі задзейнічаны самыя высокія тэхналогіі. Ён быў навучаны ўсяму гэтаму не за адзін месяц. Пасля падрыхтоўкі ён быў маршрутаваны (так кажуць у КДБ) на нашу тэрыторыю».
Што ж, у адным з ім можна пагадзіцца: прахадны двор у «Мачулішчах», куды дроны лёталі на разведку тыднямі – гэта сапраўды было нешта неверагоднае.
