На русском языке:
В Беларуси закрывают офис USAID
Спецпрадстаўнік ЗША па Беларусі Джулія Фішэр выступіла з заявай наконт спроб перашкаджаць праграмам ЗША ў галіне міжнароднага развіцця і публічнай дыпламатыі ў Беларусі. Пра гэта гаворыцца на сайце пасольства.
Фішэр адзначае, што 20 кастрычніка беларускія ўлады праінфармавалі Злучаныя Штаты аб новых мерах, скіраваных на перашкоды працы амбасады ЗША ў Мінску. Так, прымусова закрыты офіс па сувязях з грамадскасцю пасольства і Агенцтва ЗША па міжнародным развіцці (USAID), уключаючы Амерыканскі цэнтр у Мінску. У выніку гэтага амбасада вымушана звольніць больш за 20 беларускіх супрацоўнікаў.
«Гэтыя дзеянні адлюстроўваюць глыбокую занепакоенасць уладаў Беларусі роляй дыпламатыі, сувязяў паміж людзьмі і незалежнай грамадзянскай супольнасцю. Злучаныя Штаты не адступяць ад свайго абавязацельства дапамагаць развіццю дэмакратыі і правоў чалавека ў Беларусі і падтрымліваць памкненні беларускага народа ў пабудове больш перспектыўнай будучыні ў свабоднай і незалежнай Беларусі, і гэтыя нядаўнія меры не прымусяць нас адмовіцца ад нашай працы па інфармаванні і ўзаемадзеянні з людзьмі, якая прыносіла карысць беларускаму народу і спрыяла развіццю адносін паміж грамадзянамі нашых краін», — заявіла Фішэр.
Святлана Ціханоўская ў сваім твітары выказала шкадаванне аб сітуацыі, якая здарылася, і напісала: «Яны вернуцца ў новую Беларусь. Прашу працягваць працу для беларусаў — мы бачым і цэнім гэтую паслядоўную падтрымку».
The regime closes @USEmbBy Public Diplomacy & @USAID offices, incl. the American Center in Minsk. Thankful to them for years of developing Belarus-🇺🇸 friendship. They will return to new Belarus. I ask them to continue work for Belarusians – we see & value this consistent support. pic.twitter.com/OVFWMECqLH
— Sviatlana Tsikhanouskaya (@Tsihanouskaya) October 29, 2021
Закрыццё офіса USAID у Беларусі пракаментаваў і афіцыйны прадстаўнік Дзярждэпартамента ЗША Нэд Прайс, які лічыць, што гэта адлюстроўвае глыбокую няўпэўненасць афіцыйных беларускіх уладаў у дыпламатыі, адносінах паміж людзьмі, адкрытасці і грамадзянскай супольнасці.
The forced closure of our American Center and @USAID offices at @USEmbBy reflects Belarusian authorities’ deep insecurity about diplomacy, people-to-people ties, openness, and civil society. U.S. commitment to democracy and human rights in Belarus endures. https://t.co/eg5XGxowbg
— Ned Price (@StateDeptSpox) October 29, 2021
Адміністратар USAID па Беларусі Саманта Паўэр апублікавала заяву, у якой адзначыла, што больш за дваццаць гадоў USAID інвестуе ў здароўе, годнасць і росквіт беларусаў і зараз гэтая праца знаходзіцца пад пагрозай з-за дзеянняў беларускіх уладаў.
«Нягледзячы на вельмі рэпрэсіўныя захады беларускіх уладаў, грамадзяне Беларусі застаюцца непахіснымі ў сваіх закліках да дэмакратычнага ўраду, які паважае правы чалавека. USAID працягне падтрымліваць народ Беларусі і працягне падтрымліваць праграмы па развіцці грамадзянскай супольнасці і пашырэнні эканамічных магчымасцяў для беларусаў», — гаворыцца ў заяве.
Нагадаем, з 1999 года Агенцтва ЗША па міжнародным развіцці (USAID) садзейнічала станаўленню Беларусі як дэмакратычнай дзяржавы з рынкавай эканомікай, развіццю беларускай грамадзянскай супольнасці, прыватнага сектара і мясцовых супольнасцяў. У сярэдзіне 2000-х гадоў унесла значны ўклад у ахову здароўя сем’яў, якія пражываюць у раёнах, якія пацярпелі ад радыяцыі. Праграмы эканамічнага росту садзейнічалі ўмацаванню і развіццю прыватнага сектара, асабліва малых і сярэдніх прадпрыемстваў, а таксама фарміравалі спрыяльнае дзелавое асяроддзе. Адзін з напрамкаў работы быў звязаны з дапамогай Беларусі ў барацьбе з гандлем людзьмі і аказаннем фінансавай падтрымкі пацярпелым. З 2005 па 2015 гады праграмы USAID таксама садзейнічалі прадухіленню жорсткага абыходжання з дзецьмі. Адзін з напрамкаў дзейнасці садзейнічаў пашырэнню ўдзелу людзей з інваліднасцю ў сацыяльным і эканамічным жыцці мясцовых супольнасцяў праз праграмы падтрымкі людзей з абмежаванымі магчымасцямі і ўмацаванне здольнасцей грамадскіх арганізацый да прасоўвання правоў і інтарэсаў людзей з інваліднасцю.
