На русском языке:
В Беларуси появился новый табачный производитель?
Міністэрства па падатках і зборах апублікавала свежыя дадзеныя аб рознічных цэнах на тытунёвыя вырабы з 1 жніўня 2024 года – гэта стандартная штомесячная публікацыя ад МПЗ, у якой звычайна проста паказваюць новыя цэны на цыгарэты, але ў гэты раз там ёсць яшчэ сёе-тое.
У раздзеле «Цыгарэты з фільтрам, якія вырабляюцца на тэрыторыі Рэспублікі Беларусь» зʼявілася новая кампанія – ЗТАА «АЛІДЗІ-Вест». Яна стала 5-й сярод іншых тытунёвых вытворцаў, указаных у публікацыі МПЗ. Раней у спісе прысутнічалі: ГТФ «Нёман», ТАА «Тытунь-інвест», ТАА «Інтэр Табака» і ТАА «Сентоні ПРА», пра якую мы ўжо пісалі ў лютым.
Паведамляецца, што ЗТАА «АЛІДЗІ-Вест» задэкларавала цэны на два віды цыгарэт марак Kent Crystal Red і Kent Crystal Exotic. Вядома, што гэтая кампанія была зарэгістраваная ў Беларусі яшчэ ў 2011 годзе, гэта філіял расійскай кампаніі «Алідзі», які спецыялізуецца на аптовым гандлі нехарчовымі таварамі.
Характэрна, што паводле інфармацыі шэрагу крыніц, у сакавіку 2024 года ЗТАА «АЛІДЗІ-Вест» атрымала ліцэнзію на вытворчасць алкагольнай, нехарчовай спіртазмяшчальнай прадукцыі, нехарчовага этылавага спірту і тытунёвых вырабаў. А яшчэ раней, у студзені 2017 года, гэтая кампанія атрымала ліцэнзію і на аптовы гандаль і захоўванне алкагольнай і тытунёвай прадукцыі.
