In English:
Belarusian cigarettes worth €2.5 million, which were transported in Estonian cars, detained in Lithuania
На русском языке:
В Литве задержали беларусские сигареты на €2,5 млн, которые перевозились в эстонских вагонах
У канцы студзеня ў Літве перахапілі тры цягнікі з Беларусі, якія перавозілі буйныя партыі кантрабандных цыгарэт. Пра гэта паведамляе літоўская памежная служба.
Першую партыю кантрабанды знайшлі 20 студзеня ў літоўскім Панявежысе. У грузавым цягніку, які перавозіў каменную крошку, было знойдзена 226,5 тысяч пачкаў цыгарэт NZ Gold, NZ 8 і NZ 10 вытворчасці беларускай тытунёвай фабрыкі «Нёман». Самі цыгарэты былі загорнуты ў лісты бляхі, а іх кошт ацэньваецца ў больш за €805 000.
Падчас расследаванняў былі затрыманыя трое грамадзян Беларусі 28, 32 і 33 гадоў, а таксама 41-гадовы літовец. Іх пакінулі пад вартай на тэрмін ад 15 дзён да 2 месяцаў. Акрамя таго, у іх былі канфіскаваныя тры легкавыя і адзін грузавы аўтамабіль.
Ужо на наступны дзень, 21 студзеня, літоўскія памежнікі затрымалі партыю кантрабандных цыгарэт у Шаўляі. У пяці вагонах цягніка з Беларусі, які перавозіў друз, было знойдзена 175 тысяч пачкаў цыгарэт загорнутых у ліставы метал. Гэта былі цыгарэты марак Fest і Minsk Capital QS з беларускімі акцызнымі маркамі. Кошт кантрабанды склаў больш за €622 000.
Затрыманы цягнік з кантрабанднымі цыгарэтамі (21 студзеня ў Шаўляі) / pasienis.lt
Чарговую партыю знайшлі 26 студзеня. У вагонах цягніка, які таксама перавозіў друз, было знойдзена 321,5 тысячы пачкаў беларускіх цыгарэт розных марак. Агульны кошт знойдзенай кантрабанды ацэньваецца ў больш за €2 500 000.
Мяркуючы па апублікаваных фота, вагоны, у якіх перавозілася кантрабанда, належаць эстонскай транспартнай кампаніі Rail Trans Invest OU. Аднак вагоны цягніка, які быў затрыманы 26 студзеня, належаць БЧ. Нягледзячы на тое, што нумар вагона замазаны, па фота можна зразумець, што вагоны новыя. Той, што на фота, выпушчаны 31 мая 2021 года на Магілёўскім вагонабудаўнічым заводзе. Ён прызначаны для перавозкі цэментных сумесей, а прыпісаны да чыгуначнай станцыі «Жыткавічы». Акрамя таго, на вагоне ёсць надпіс беларускай кампаніі «БудМатІнвест».
Калі ў вас ёсць дадатковая інфармацыя пра кантрабанду беларускіх цыгарэт у краіны Балтыі, пішыце ў @motolko_bot або праз ананімную форму для сувязі ніжэй.
