Тэлеграм-канал «Беларускі парадак» апублікаваў меркаванне пра расійскіх кансультантах. Прыводзім іх словы без зменаў.
Сучасны Мінск для паліттэхнолагаў з’яўляецца даволі бесперспектыўным месцам. Грамадскае жыццё загнанае ў падполле, бізнэс максімальна дэпалітызаваны і наогул зона максімальна таксічная. Дзякуючы гэтаму палітычныя кансультанты ў нашых краях птушкі рэдкія, і без асаблівай патрэбы да нас не залятаюць.
І тут стала вядома, што на днях у Мінск прыляталі два буйныя расійскія тэхнолагі. Першы, Філіп Гураў, генеральны дырэктар pr-агенцтва «Гураў і партнёры». Сярод іншых кліентаў пазначаны «Газпрамнафта» і Рассупрацоўніцтва. У апісанні падкрэсліваецца, што «асабіста кансультаваў прэзідэнтаў шэрагу краін». Праўда якіх, не ўдакладняецца.
Другая фігура не менш характэрная. Андрэй Багданаў, член праўлення Расійскай асацыяцыі палітычных кансультантаў. Асоба цікавая — быў тэхнічным кандыдатам на прэзідэнцкіх выбарах 2008 года, на працягу палітычнай кар’еры дапамагаў Крамлю драбіць сілы апазіцыі (аджаў у свой час партыю ў Міхаіла Касьянава, выціснуў Міхаіла Прохарава з «Правай справы» ў 2012 годзе, не даў Навальнаму зарэгістраваць партыю «Народны альянс»).
Акрамя барацьбы з апазіцыяй, рабіў гешэфт на гандлі партыямі-пустышкамі (ад $250к за партыю) і продажы месцаў у партыйных спісах на выбарах (1 млн у расійскіх рублях).
Што такія людзі маглі рабіць у Мінску, застаецца толькі здагадвацца. Буйны бізнэс, які можна кансультаваць, затойваецца і выжывае па сваіх правілах. Альтэрнатыўных гульцоў на паляне няма. І адзіным кліентам тут можа быць толькі беларускі рэжым.
Для чаго яму спатрэбіліся расійскія кансультанты? Успамінаем, што ўжо хутка як год споўніцца абяцанню Лукі пабудаваць шматпартыйную сістэму. Спецыялістаў па партбудаўніцтве ў нас няма, ім проста няма адкуль узяцца. І тут глядзім на спецыялізацыю Багданава — партыйнае будаўніцтва, рэгістрацыя партый і г.д. Магу выказаць здагадку, што тэхнолагі прыязджалі менавіта за гэтым — заехалі на дзянёк, каб ацаніць стан паляны і магчымасць на ёй зарабіць.
Але спяшаюся засмуціць. Незалежна ад таго, колькі грошай паабяцае звар’яцелы кліент, гэты кэш выйдзе бокам. Таксічнасць пацыента будзе пераносіцца на ўсіх, хто з ім звяжацца. Калі хтосьці вырашыць дапамагчы Лукашэнку накляпаць партый для «кіруемай дэмакратыі» па расійскім узоры, гэта верны спосаб сапсаваць сабе рэпутацыю, атрымаць санкцыі, а то і пазбавіцца кантрактаў на іншых рынках. Так што як кажуць, «не чапай, бо лясне».
P.S.
Цікавы факт, міма якога прайсці не магу. Багданаў яшчэ і вядомы масон, кіраўнік Вялікай ложы Расіі. Але гэта не да тэорыі змовы. Беларускае масонства раней з’яўлялася часткай расійскага, але ў 2019 абвесціла аб стварэнні сваёй незалежнай ложы. Аддзяленне падтрымалі масоны Літвы, Польшчы і Украіны. Супраць, натуральна, выступіла расійскае масонства. Асабліва стараўся якраз Багданаў. Высновы можна зрабіць самім, але гісторыя паўтараецца нават у такіх дэталях.
