In English:
Opinion. «Mythology of Belarus» on a money casket for Lukashenka
На русском языке:
Мнение. «Мифология Беларуси» о денежном ларчике в Крыму
Тэлеграм-канал «Міфалогія Беларусі» апублікаваў пост пра словы Лукашэнкі аб прызнанні Крыма расійскім і магчымыя прычыны ягоных выказванняў. Прыводзім словы аўтара без зменаў.
Так, Лукашэнка ў інтэрв’ю Кісялёву заявіў, што прызнае Крым і дэ-юрэ, і дэ-факта расійскім, і збіраецца наведаць паўвостраў
Ну, да гэтага трэба дайсці. Як мы пісалі пару тыдняў таму, «[Крэмль] карыстаецца гэтай магчымасцю, каб сціснуць і, відаць, звязаў сур’ёзную фінансавую падтрымку з адназначным прызнаннем Крыма расійскім. Пару мільярдаў знойдзецца, намякае Крэмль, але куфэрак з імі ў Крыме – вэлкам!»
Уласна, сур’ёзная эскалацыя сітуацыі з мігрантамі на мяжы з Польшчай два тыдні таму была ўскосна звязана з гэтым ціскам – як спроба саскочыць і выбіць грашовыя рэсурсы «вайнатворчай місіяй».
Заклікаючы на мінулым тыдні да дыялогу з апазіцыяй, Пуцін пад нявырашанымі праблемамі ў Беларусі таксама меў на ўвазе не рэалізаваныя дадатковыя саступкі з боку Лукашэнкі, перш за ўсё, датычна адназначнага прызнання Крыма расійскім – гл. «Пераклад заявы Пуціна».
Наогул, першапачатковая ідэя Крамля, мабыць, заключалася ў тым, што Лукашэнка прыбудзе ў Крым яшчэ 4 лістапада і менавіта там у расійскі Дзень народнага адзінства ў кампаніі Пуціна падпіша інтэграцыйныя дамовы.
Аднак за тыдзень да гэтага Лукашэнка наведаў «чырвоную зону» ў лідскай інфекцыйнай бальніцы, дзе вельмі доўга і карцінна не мог надзець медыцынскую маску. Па гэтай прычыне, з паездкі ў Крым тады ўдалося саскочыць.
Візіт Лукашэнкі ў Крым – для Крамля і важная псіхалагічная вяха ў адносінах з Мінскам, і практычнае палітычнае дзейства.
Па задуме Масквы, падпісанне інтэграцыйных пагадненняў (4 лістапада) і іх наступнае ўвасабленне ў жыццё пазбавіць Беларусь суверэнітэту ва ўнутраных справах, а канчатковае прызнанне Крыма расійскім — у знешніх.
Гэта два game changer’а, па якіх і даціскае Крэмль для фінальнага ператварэння Беларусі ў БССР-2. Гэта тая цана, якую Масква патрабуе за аказанне Лукашэнкам далейшай фінансавай і палітычнай падтрымкі, у тым ліку ў выглядзе прызнання новай канстытуцыі. Яна заклікана забяспечыць яго далейшае кіраванне і дынастычны транзіт улады ў сярэднетэрміновай перспектыве.
Разам, па прылёце Лукашэнкі ў Севастопаль грашовае пытанне будзе ў хуткасці вырашана праз Еўразійскі фонд стабілізацыі і развіцця або праз дазвол выкарыстоўваць рэшту крэдыту на будаўніцтва АЭС.
Альбо (што менш верагодна, але магчыма), калі Лукашэнка ўсё ж паспрабуе падняць стаўкі яшчэ вышэй і навязаць сваю гульню, у бліжэйшыя тыдні адбудуцца ўжо больш сур’ёзныя правакацыі на мяжы Беларусі і ЕС.
