На русском языке:
Мнение. Никита Соловей об отмене масочного режима
Урач-інфекцыяніст і кандыдат медыцынскіх навук Мікіта Салавей на сваёй старонцы ў Facebook адрэагаваў на рашэнне Міністэрства аховы здароўя аб адмене масачнага рэжыму. Прыводзім яго словы без зменаў.
З афіцыйнага канала, прабачце за гэтую назву, «Міністэрства аховы здароўя Рэспублікі Беларусь»: афіцыйны каментар да пастановы № 111 ад 20 кастрычнiка 2021 года «Выключана патрабаванне абавязковасці выкарыстання фізічнымі асобамі сродкаў індывідуальнай абароны пры наведванні аб’ектаў, арганізацый, аўтамабільнага, за выключэннем аўтамабіляў асабістага карыстання, паветранага, воднага, чыгуначнага транспарту, уключаючы метрапалітэн».
Патлумачу чалавечай мовай. Падчас пандэміі COVID-19, яшчэ хутчэй за ўсё нават не на піку захворвання, калі паліклінікі і стацыянары ўстаноў аховы здароўя ўсіх рэгіёнаў краіны захлёбваюцца ад пацыентаў з COVID-19, недахопу кіслароду, лекавых сродкаў (тацылізумаба ў многіх месцах нуль, рэмдэсівір, які ў ідэале павінен прызначацца ўсім кіслародазалежным пацыентам як мага раней, сыходзіць са свістам, не паспеўшы з’явіцца пасля чарговай абмежаванай закупкі і г.д.), калі прыпынена аказанне дапамогі пацыентам практычна з усёй планавай паталогіяй, калі многіх пацыентаў нават з вострымі захворваннямі лекары вымушаныя адпраўляць лячыцца дадому, бо фізічна няма куды шпіталізаваць, не рызыкуючы інфікаваць яшчэ і кавідам, адмяняецца абавязковы масачны рэжым у месцах масавага збору людзей. Напрыклад, у метрапалітэне ў гадзіну пік, у крамах, гандлёвых цэнтрах і г.д.
Мяне не здзіўляе пазіцыя чыноўнікаў МЗ РБ. Там даўно ўсё зразумела. Асноўная мэта гэтага «міністэрства» ўжо даўно – выслужыцца перад вышэйстаячымі чыноўнікамі, і дакладна не клопат пра людзей, усе паслядоўныя дзеянні ад фальсіфікацый статыстыкі па захворваннях і смяротнасці ад кавіда да дзіўна «тактычных» рашэнняў пра гэта яскрава сведчаць. Службовым асобам у недалёкай будучыні за гэта яшчэ давядзецца адказаць перад законам і беларускім народам. Дзейны прэцэдэнт Бразіліі вам у дапамогу.
Мяне здзіўляе пазіцыя вельмі многіх маіх калег. Няўжо ў санітарна-эпідэміялагічнай службе, інфекцыйнай службе, анестэзіялогіі і рэаніматалогіі, іншых галінах, сярод штатных і пазаштатных спецыялістаў не засталося сапраўдных лекараў, для якіх здароўе і дабрабыт свайго народу значна важней, чым імгненны дабрабыт купкі чыноўнікаў? Колькі яшчэ трэба сотняў смерцяў пацыентаў у дзень, каб вы дасталі свае языкі з аднаго месца і нарэшце пачалі рабіць усё магчымае для спынення існуючага з кавідам вар’яцтва? У тым ліку, уплываючы на ключавыя рашэнні па прадухіленні далейшага распаўсюджвання пандэміі. Напэўна, гэта рытарычнае пытанне. Але можа хоць хтосьці яшчэ зможа задумацца…
Дарагія пацыенты! Медыкі не панікуюць. Яны з апошніх сіл, аказваючы дапамогу дома, у паліклініках і стацыянарах, робяць усё магчымае, каб вы выйшлі з катастрофы з COVID-19 з мінімальнымі стратамі. На жаль, не ўсё залежыць ад нас саміх. Я яшчэ раз заклікаю як мага хутчэй вакцынавацца ўсіх, хто гэтага яшчэ не зрабіў, выкарыстоўваць маскі хаця б у транспарце і месцах масавага збору людзей, адмяніць неабавязковыя падыходы ў крамы, гандлёвыя цэнтры, на забаўляльныя мерапрыемствы, клапаціцца не толькі пра сябе, але пра людзей побач з вамі, якія часцяком могуць быць больш слабыя, чым мы. Толькі разам мы зможам справіцца!
Нядаўна Мікіта Салавей запісаў відэа, у якім падрабязна адказаў на пытанні пра вакцынацыю супраць COVID-19.
