На русском языке:
«Беларускі Гаюн» в данный момент не видит фактов перемещения ядерного оружия в Беларусь
Сёння, выступаючы на ПМЭФ, Пуцін заявіў, што Расія перамясціла ў Беларусь частку ядзерных боепрыпасаў:
«Першыя ядзерныя зарады дастаўленыя на тэрыторыю Беларусі. Але толькі першыя. Гэта першая частка. Але да канца лета, да канца года мы гэтую працу выканаем цалкам і поўнасцю».
Па стане на 23:20 16.06.23, «Беларускі Гаюн» не мае ніякай пацвярджальнай інфармацыі пра пачатак рэальнага перамяшчэння ТЯЗ (тактычнай ядзернай зброі) ў Беларусь.
Хочам звярнуць увагу, што за апошнія месяцы як Пуцін, так і Лукашэнка зрабілі шэраг супярэчлівых заяў аб перамяшчэнні ТЯЗ ў Беларусь. Вось шэраг прыкладаў:
25.03 – Пуцін заявіў, што РФ размесціць ТЯЗ ў Беларусі да 1 ліпеня 2023 года.
25.05 – Лукашэнка заявіў, што перамяшчэнне ТЯЗ на тэрыторыю Беларусі ўжо пачалося.
9.06 – Пуцін заявіў, што размяшчэнне ядзернай зброі ў Беларусі пачнецца пасля 7-8 ліпеня.
13.06 – на пытанне «Вы сказалі, ужо атрымалі ад Расіі бомбы і ракеты?» Лукашэнка адказаў: «Ну, не ўсё… пакрысе».
Такім чынам, заявы Пуціна і Лукашэнкі аб размяшчэнні ТЯЗ самі сабе супярэчаць і могуць казаць пра:
- адсутнасці ў Лукашэнкі ўсёй інфармацыі і кантролю над працэсам размяшчэння ТЯЗ ў Беларусі;
- узгодненай паміж Пуціным і Лукашэнкам кампаніі па дэзінфармацыі, з мэтай, да прыкладу, стварэння палітычнага ціску напярэдадні саміту НАТА ў Вільні і ідучага ўкраінскага контрнаступлення.
Таксама хочам падкрэсліць, што ў сённяшняй заяве Пуцін не ўдакладніў тып, паводле яго слоў, перамешчаных у Беларусь боепрыпасаў. Раней жа анансавалася перадача боепрыпасаў для прымянення штурмавікамі Су-25 і АТРК «Іскандэр». Верагодным жа спосабам дастаўкі зваўся чыгуначны транспарт.
Паўторым, на дадзены момант нашай маніторынгавай групай не зафіксавана перамяшчэнне/прыбыццё ТЯЗ з РФ у Беларусь.
Мы ўважліва сочым за сітуацыяй, і калі вы заўважылі любую падазроную актыўнасць на тэрыторыі Беларусі, просім усё паведамляць нам у @HajunBYbot. Вы можаце перадаваць інфармацыю праз сваякоў/сяброў за мяжой ці пісаць нам праз ананімную форму сувязі на сайце.
