Прафесійны саюз беларусаў Вялікабрытаніі (PUBB) паведамляе, што найбуйнейшая брытанская цыгарэтная кампанія British American Tobacco (BAT) спыніла ўсе адносіны з гродзенскай тытунёвай фабрыкай «Нёман».
Гэта BAT пацвердзілі ў сваім прэс-рэлізе у адказ на чарговы зварот Прафесійнага саюза беларусаў Вялікабрытаніі.
«BAT прыпыніла сваю дзейнасць з GTF Neman і ў цяперашні час не ладзіць вытворчасць сваёй прадукцыі на гэтым заводзе», — гаворыцца ў каментары BAT для выдання iNews.
Такім чынам, BAT афіцыйна спыняе вытворчасць цыгарэт
у Беларусі пад сваімі брэндамі, такімі як Kent, Lucky Strike, Pall Mall, Dunhill, Vogue, Rothmans і іншымі.
У канцы мая пасля інцыдэнту з пасадкай самалёта Ryanair і захопам журналістаў Рамана Пратасевіча і Соф’і Сапегі, кампанія British American Tobacco пачала расследаванне магчымых парушэнняў правоў чалавека кіраўніцтвам тытунёвай фабрыкі «Нёман» і абяцала прыняць меры, калі парушэнні выявяцца.
