На русском языке:
Главред TUT.BY Марина Золотова и директор Людмила Чекина приговорены к 12 годам колонии
Суд пачаўся 9 студзеня і праходзіў у закрытым рэжыме, перадае «Наша Ніва». Акрамя Чэкінай і Золатавай, па справе праходзілі рэдактарка аддзела эканомікі і палітыкі Вольга Лойка, карэспандэнтка Алена Талкачова і юрысконсульт Кацярына Ткачэнка.
Перад судом Талкачова, Лойка і Ткачэнка выехалі за мяжу. Крымінальную справу ў дачыненні да іх выдзелілі ў асобную вытворчасць.
Чэкінай былі інкрымінаваныя «ўхіленне ад выплаты падаткаў, арганізацыя распальвання сацыяльнай варожасці і варажнечы, а таксама распаўсюд матэрыялаў з заклікамі да дзеянняў, накіраваных на прычыненне шкоды нацыянальнай бяспецы Беларусі».
Золатава абвінавачвалася ў «дапамаганні ва ўхіленні ад выплаты падаткаў, распальванні сацыяльнай варожасці і варожасці, распаўсюдзе матэрыялаў з заклікамі да дзеянняў, накіраваных на прычыненне шкоды нацыянальнай бяспецы Беларусі».
Марына Золатава і Людміла Чэкіна, 17 сакавіка 2023 / Вясна
Нацыянальная лідарка Святлана Ціханоўская выказалася пра прысуд Марыне Золатавай і Людміле Чэкінай:
«Сёння галоўную рэдактарку і гендырэктарку TUT.by асудзілі да 12 гадоў калоніі. Ведаеце, да 2020 года TUT.by быў для мяне проста сайтам, дзе я кожны дзень чытала навіны. Ужо пазней я пазнаёмілася з людзьмі, якія яго робяць, убачыла, як журналісты і рэдактары стаяць адно за аднаго. І як прадстаўнікі ўсіх беларускіх медыяў падтрымліваюць калегаў падчас цяжкасцяў. Вядома, прысуд Марыне Золатавай і Людміле Чэкінай – гэта чарговая спроба рэжыму забіць сумленную журналістыку ў Беларусі. А яшчэ гэта асабістая помста гэтым цудоўным жанчынам і вялікім прафесіяналкам.
Сёння я б вельмі хацела абняць іх блізкіх і сказаць: «Паглядзіце, як адбудавалі працу вашыя калегі». Як тыя, каго Марына і Міла бралі на працу і вучылі, працягваюць іх справу. Як не губляюць моц духу журналісты – і робяць мерч «ва ўсім вінаваты TUT.by», калі ў чарговы раз рэжым абвінавачвае іх ва ўсіх бедах нашай краіны. Я бачу гэтую працу, бачу вочы людзей, якія за ёй стаяць. І абсалютна не сумняюся ў тым, што ўсе каштоўнасці Мілы і Марыны – перамогуць, а яны, нарэшце, выйдуць на волю. А пакуль свет не можа чуць іх саміх – мы будзем іх галасамі».
