На русском языке:
МИД молчит. Руководство Курдистана призывает защитить курдов находящихся в Беларуси
Амбасадар Беларусі ў Іраку і Турцыі Віктар Рыбак правёў сустрэчы з кіраўніцтвам іракскага аўтаномнага рэгіёна Курдыстан. Сёння ён сустрэўся з былым прэзідэнтам Курдыстана — Масудам Барзані і прэм’ер-міністрам іракскага Курдыстана Масрурам Барзані. Бакі абмеркавалі міграцыйны крызіс у Беларусі, які працягваецца, які, як заявілі ў Курдыстане, павінен быць вырашаны ў адпаведнасці з міжнародным правам.
Як паведамляе афіцыйны сайт старшыні Дэмакратычнай партыі Курдыстана, Масуд Барзані заклікаў глядзець на праблему з нелегальнай міграцыяй з гуманітарнага пункту гледжання і пры дапамозе гуманітарных арганізацый абараніць жыцці курдскіх жанчын і дзяцей, якія знаходзяцца ў Беларусі. Акрамя таго, Барзані падкрэсліў неабходнасць міжнароднай каардынацыі з усімі бакамі для пошуку рашэнняў праблемы кантрабанды і нелегальнай іміграцыі.
Адметна, што на момант публікацыі, пра гэтыя сустрэчы не паведамлялася ні на сайце МЗС РБ, ні ў дзяржаўных СМІ.
Выданне kurdistan24 піша, што Віктар Рыбак сёння правёў сустрэчу і з прэм’ерам іракскага Курдыстана. Паведамляецца, што яны абмеркавалі ўмовы прыбывання мігрантаў у Беларусі і сышліся на думцы аб неабходнасці падтрымліваць «каардынацыю», калі справа даходзіць да вырашэння любых праблем, з якімі сутыкаюцца курды падчас паездкі ў Беларусь. Акрамя таго паведамляецца, што на сустрэчы была пацверджана неабходнасць прадухілення незаконных пераходаў і іміграцыі. Беларускі пасланнік у сваю чаргу выказаў «абсалютную гатоўнасць» сваёй краіны развіваць і пашыраць двухбаковыя сувязі з Курдыстанскім рэгіёнам.
Віктар Рыбак і Масуд Барзані / Фота: masoudbarzani.krd
Выданне адзначае, што ў апошнія месяцы многія мігранты прыбылі ў Беларусь з Ірака і Курдыстана. Далей яны спрабавалі незаконна перасекчы межы Беларусі з Літвой, Латвіяй і Польшчай, што выклікала міграцыйны крызіс.
