Суд расійскага горада Белгарад пакінуў без змены апеляцыю па справе аб экстрадыцыі грамадзяніна Беларусі, 31-гадовага Вадзіма Дубойскага. Пра гэта паведамляе тэлеграм-канал праваабарончага цэнтра «Вясна» @viasna_brest.
Дубойскага затрымалі 12 красавіка 2021 года ў Расіі, а 16 красавіка 2021 года яго ўзялі пад варту ў СІЗА-3 Белгарада. Як мяркуецца, у Беларусі супраць яго заведзеная крымінальная справа па артыкуле 293 КК (Масавыя беспарадкі) за ўдзел у пратэстах у Брэсце ў жніўні 2020 года.
Па словах сваякоў Вадзіма Дубойскага, у жніўні 2020 года ён быў затрыманы і цягам трох дзён разам з іншымі ўтрымліваўся ў гаражах брэсцкага Дома правасуддзя, дзе затрыманых увесь час збівалі.
Расійскія праваабаронцы будуць рыхтаваць кейс Вадзіма Дубойскага ў ЕСПЧ.
