На русском языке:
Разведка Литвы: «В корпусе реактора на БелАЭС были найдены трещины, режим это скрыл»
Літоўская разведка паведаміла, што ў 2022 годзе рэжым у Беларусі і карпарацыя «Расатам» схавалі інцыдэнты і дэфекты рэактарных сістэм, якія былі выяўлены на першым і другім энергаблоках БелАЭС.
Паводле звестак разведкі, у траўні 2022 года на АЭС у Астраўцы былі знойдзены трэшчыны ў зварных швах корпуса рэактара аднаго з блокаў. На думку спецыялістаў, якасна ўстараніць дэфекты можна было б толькі пасля дэмантажу рэактара, але па палітычных матывах такое рашэнне нават не разглядалася.
Акрамя таго, паведамляецца, што праблемы былі выяўленыя і на другім энергаблоку. Напрыклад, хімічны склад вады ў першым цыркуляцыйным контуры, які астуджвае рэактар энергаблока быў зменены, і ён быў забруджаны смоламі.
«Неабходна было правесці механічную ачыстку ўсяго контуру трубаправода і выгрузку ядзернага паліва. Ядзерныя цеплавыдзяляльныя зборкі былі выгружаны з рэактара, ачышчаны, а тыя, што не ўдалося ачысціць, заменены новымі. Вельмі верагодна, што тэхнічныя дэфекты на АЭС будуць ліквідаваны пасля пуску другога блока», – паведамілі ў разведцы.
У разведвальнай ацэнцы таксама паказваецца, што «Расатам» зацікаўлены ў пашырэнні свайго ўплыву за мяжой, стварэнні залежнасці ад сваіх тэхналогій, а кіраўніцтва карпарацыі схільна ўлічваць палітычныя інтарэсы расійскага ўрада.
Расатам, які будуе і абслугоўвае атамныя электрастанцыі ў іншых краінах і пастаўляе на іх уранавую прадукцыю, тым самым папаўняе расійскі дзяржаўны бюджэт, умацоўвае ваенную моц краіны і садзейнічае росту палітычнага ўплыву Расіі.
Нагадаем, раней выданне Euroradio паведамляла, што ў красавіку 2022 года паміж 17 і 29 чыслом на БелАЭС адбылося апрамяненне персаналу. Афіцыйна інфармацыя аб здарэнні не публікавалася.
Якраз у перыяд 17-29 красавіка 2022 на «планавы рамонт» быў спынены першы энергаблок Беларускай АЭС. Па словах выдання, пра апрамяненне персаналу ўдалося высветліць з-за «дзіркі» ў сістэме электронных зваротаў у дзяржорганы.
Адзін са зваротаў, які на БелАЭС накіраваў ТАА «НафтаХімДыягностыка», гучаў так: «Заява – папярэджанне аб апрамяненні персаналу». У тэксце гаварылася, што відэа моманту апраменьвання людзей дасланае на электронную пошту [email protected]. Гэта афіцыйны кантактны мэйл адміністрацыі БелАЭС.
