In English:
«System for circumventing sanctions»: Banks of Belarus started to join the SPFS last year
На русском языке:
«Система для обхода санкций»: Банки РБ начали подключать к СПФС еще в прошлом году
9 снежня прадстаўнік Цэнтральнага банка Расійскай Федэрацыі (ЦБ РФ) Дзяніс Барышкоў паведаміў, што ўсе беларускія банкі ўжо падключаныя да расійскай сістэмы перадачы фінансавых паведамленняў. Аднак выданню motolko.help стала вядома, што пачалося гэта значна раней.
Што гэта за сістэма?
У Беларусі гэтую сістэму называюць «Сэрвіс-бюро сістэма перадачы фінансавых паведамленняў» (CБ СПФП). На сайце ЦБ РФ апублікаваны спіс банкаў падлучаных да яе, сярод якіх і ўсе беларускія банкі, у тым ліку Нацбанк і Банк развіцця. Няма ў спісе толькі двух: БСБ Банк і ТК Банк.
Беларускія банкі падключаныя да СПФП / cbr.ru
CБ СПФП уяўляе сабой аб’яднаную аўтаматызаваную сістэму міжбанкаўскіх разлікаў паміж РБ і РФ. Яна дазваляе праводзіць міждзяржаўныя плацяжы абыходзячы SWIFT, што ў сваю чаргу дазваляе праводзіць плацяжы ў абыход санкцый ЕС і ЗША.
Варта таксама сказаць, што інтэграцыя беларускай і расійскай сістэм перадачы фінансавай інфармацыі прадугледжана адной з 28 саюзных праграм па «паглыбленай інтэграцыі». Летась Нацбанк РБ, каментуючы магчымае адключэнне Беларусі ад SWIFT, адзначаў, што інтэграцыя беларускай і расійскай сістэм СПФІ (сістэма перадачы фінансавай інфармацыі) і СПФП дазволіць праводзіць плацяжы паміж дзвюма краінамі без выкарыстання SWIFT.
Варта адзначыць, што апрача банкаў, да расійскага аналага SWIFT падключаныя таксама Беларуская валютна-фондавая біржа і Беларускі міжбанкаўскі разліковы цэнтр.
Якія банкі і калі падключыліся да СПФП?
Заканамерна было б выказаць здагадку, што факт падключэння да расійскай сістэмы — яшчэ не азначае актыўнае карыстанне ёю. Аднак нам вядома, што правядзенне плацяжоў праз СПФП пачалося практычна адразу пасля падключэння да яе беларускіх банкаў. І ўзрастае па меры ўвядзення новых санкцый з боку ЕС і ЗША. Ну і так, падключаць іх пачалі таксама «не ўчора», а першымі сталі банкі, дзе дамінуе расійскі капітал.
- 2 сакавіка 2020 г. — «Банк ВТБ (Беларусь)», «РРБ-Банк» і «БТА Банк» (расійскі капітал)
- 10 чэрвеня 2020 г. — «Белгазпрамбанк» (расійскі капітал)
- 8 ліпеня 2020 г. — «БелВЭБ» (расійскі капітал)
- 14 верасня 2020 г. — «Ідэя Банк»
- 18 снежня 2020 г. — «Франсабанк»
- 21 снежня 2020 г. — «Абсалютбанк», «Белаграпрамбанк»
- 22 снежня 2020 г. — «Цэптэр Банк»
- 24 снежня 2020 г. — «Прыёрбанк», «БНБ-Банк»
- 4 студзеня 2021 г. — «Банк Дабрабыт»
- 11 студзеня 2021 г. — «МТБанк»
- 15 студзеня 2021 г. — «Белінвестбанк»
- 1 лютага 2021 г. — «Альфа-Банк»
- 10 лютага 2021 г. — «Парытэтбанк»
- 25 лютага 2021 г. — «Беларусбанк»
- 12 красавіка 2021 г. — «БПС-Сбербанк» (расійскі капітал)
- 20 красавіка 2021 г. — «Банк Развіцця»
Дапоўнена ў 15:40: Чытачы паведамляюць, што працы па падключэнні да СПФП пачаліся яшчэ ў 2019 годзе, але па словах людзей гэтая сістэма кепска падыходзіць для абыходу санкцый.
«Буйныя банкі не захочуць рызыкаваць прысутнасцю на заходніх рынках, а ў дробных магчымасці атрымання сродкаў з-за мяжы (і асабліва незаўважнага атрымання) моцна абмежаваныя. Па вялікім рахунку гэта дастаткова тэхнічны момант, які дазваляе крыху хутчэй ганяць грошы паміж расійскай СХП (сістэмай хуткіх плацяжоў, — заўв. motolko.help) і беларускай», — пішуць людзі.
Калі ў вас ёсць дадатковая інфармацыя аб банкаўскай сферы РБ, паведаміце нам у @motolko_bot або праз форму для сувязі ніжэй.
