На русском языке:
В борисовские «Печи» на сборы призывают 646 резервистов
Паводле інфармацыі маніторынгавай групы «Беларускі Гаюн», з 6 па 30 чэрвеня на базе 72-га аб’яднанага навучальнага цэнтра (далей – 72-ы анц) павінны прайсці зборы з рэзервістамі. Такая інфармацыя паступала нам на працягу траўня ад жыхароў Гомельскай вобласці.
Указаная інфармацыя пацвердзілася. Напрыклад, сёння ваеннымі камісарыятамі Гомельскай вобласці пачалася адпраўка рэзервістаў на зборы. У прыватнасці, аб адпраўцы рэзервістаў паведамляў ваенны камісарыят Рагачоўскага і Кармянскага раёнаў.
Адзначым, што паводле дадзеных партала дзяржзакупак, 72-гі анц 5 чэрвеня размеціў тэндэр на закупку паслуг па перавозцы ваеннаабавязаных пасля заканчэння збораў з навучальнага цэнтра ў ваенныя камісарыяты. З дакументацыі на закупку вынікае, што ўсяго на зборы з Гомельскай вобласці будзе прызвана не менш як 551 рэзервіст.
Гэтым жа тэндэрам закупляюцца паслугі па дастаўцы ваеннаабавязаных з 72-га анц у ваенкаматы горада Мінска – усяго 95 чалавек. Адзначым, што сёння МА РБ паведаміла аб адпраўцы з вайсковага камісарыята Кастрычніцкага раёна Мінска афіцэраў запасу на зборы.
Характэрна, што ў дакументацыі на закуп паслуг па перавозцы рэзервістаў указана, што дата адпраўкі (30 чэрвеня) аўтобусаў з ваеннаабавязаным зʼяўляецца пакуль папярэдняй. Нашыя крыніцы таксама паведамлялі, што дату заканчэння збораў у ваенкамаце ім не называлі. Працягласць ваенных збораў не можа перавышаць 60 дзён (у залежнасці ад віду збораў).
Раней мы паведамлялі, што ўсяго на розныя віды збораў са студзеня па май былі прызваныя не менш за 6810 чалавек. Калі дадаць сюды прызыў рэзервістаў на вучэнні тэрытарыяльна абароны Салігорскага раёна (150 чалавек) і ў 72-й анц (усяго 646 чалавек), то атрымаецца, што за студзень-чэрвень на розныя віды збораў прызавуць не менш як 7606 чалавек. Раней МА РБ паведамляла аб планах прызваць на зборы ў 2023 годзе 9 тысяч чалавек.
Такім чынам, устаноўленая квота на заклік ваеннаабавязаных будзе пераадолена ўжо ў бліжэйшыя 2-3 месяцы.
