In English:
Belarus introduces mandatory sealing of trucks from Poland
На русском языке:
В Беларуси ввели обязательное пломбирование фур из Польши
Савет Міністраў прыняў пастанову №699 «Аб змене пастановы Савета Міністраў Рэспублікі Беларусь ад 25 мая 2020 г. № 311». Згодна з дакументам, цяпер на фуры дальнабойшчыкаў, якія ўязджаюць у Беларусь з боку Польшчы, павінны будуць ставіцца спецыяльныя навігацыйныя пломбы.
Раней пломбы ў абавязковым парадку ставіліся толькі на фуры, якія ішлі з Літвы. У той жа час адзначаецца, што новаўвядзенне не закране фуры, якія ідуць транзітам праз Літву і Польшчу з Калінінграда ў Расію, а таксама цяжкавагавых і (або) буйнагабарытных транспартных сродкаў, праезд якіх прадугледжвае наяўнасць спецыяльнага дазволу.
Акрамя таго, паднялі і кошт пломбаў з 5 базавых велічынь (145 рублёў) да 10 б.в. (290 рублёў).
Паводле інфармацыі тэлеграм-канала «Эканоміка па-беларуску», навігацыйныя пломбы могуць стаць новай крыніцай даходу для афіцыйнага Мінска. Варта таксама адзначыць, што пачатак «пламбавання» фур быў пакладзены ў чэрвені 2020 года, аднак тады кошт арэнды пломбы складаў 3 базавыя, і грузы пламбавалі выбарачна.
Паводле даных Мытнага камітэта, за 2020 год праз мытную мяжу ЕАЭС у Беларусі праехала больш за 2,3 млн. грузавых транспартных сродкаў, штодзень каля 6,5 тысячы фур. Атрымліваецца, што калі паток грузавікоў застаўся на такім жа ўзроўні і ў выпадку, калі абавязковае пламбаванне ўвядуць таксама і пры ўездзе з боку Украіны і Латвіі, то максімальны заробак на пломбах у дзень можа складаць 1 885 000 рублёў або 667 млн. рублёў у год.
