Яшчэ тры навінавыя рэсурсы былі заблакаваныя на тэрыторыі Беларусі. Адно з іх — «Беларускі партызан» (Belaruspartisan.by) — вядомае апазіцыйнае медыя, якое заснаваў журналіст Павел Шарамет, які загінуў у Кіеве ў выніку выбуху аўтамабіля пры загадкавых абставінах. Сайт падвяргаецца блакаванню не ўпершыню, раней выданне блакавалі ў 2017 годзе.
У «чорны спіс» патрапілі таксама магілёўскае медыя 6tv.by і Freesmi.by (навінавы партал, які называе сябе «не прадзяржаўным і не апазіцыйным»). Іх блакаванне пацвердзіў Мінінфарм.
Калі да прэзідэнцкіх выбараў 2020 года блакаванні СМІ здараліся ў Беларусі адносна рэдка, то пачынаючы са жніўня, гэтая з’ява стала штодзённай для байнэту. У спіс на блакаванне патрапіла большасць незалежных медыя ў Беларусі: ад найбуйнейшага Tut.by да рэгіянальных СМІ з невялікім ахопам.
