На русском языке:
В военкоматах толпы желающих служить, но ответственность для «уклонистов» ужесточается. Как такое возможно?
24 кастрычніка пачалася адпраўка навабранцаў на тэрміновую службу. Агульная колькасць тых, хто прызываецца, практычна не змянялася апошнія 10 гадоў. Па інфармацыі МА РБ, двойчы ў год на тэрміновую службу прызываецца ў сярэднім па 10 000 чалавек. Не стала выключэннем і гэтая прызыўная кампанія.
У цэлым прызыўная кампанія суправаджаецца як ура-патрыятычнымі заявамі прапагандыстаў, так і ўзмацненнем жорсткасці адказнасці для ўхілістаў. Што важна – заявы прапагандыста супярэчаць сутнасці заканатворчага працэсу. Мяркуйце самі.
Чакана ў прапагандыстаў усё выглядае дастаткова пазітыўна. Тут вам і «аншлаг у ваенных камісарыятах», і «другі год ваенкаматы адзначаюць тэндэнцыю павышэння матывацыі да праходжання воінскай службы». Мара любога ваенкама!
Аднак ёсць і іншы бок медаля. Так, 19 кастрычніка, за пяць дзён да пачатку адпраўкі навабранцаў у войскі, быў апублікаваны законапраект, які ўзмацняе жорсткасць крымінальнай і адміністрацыйнай адказнасці за ўхіленне ад тэрміновай службы. Ужо 1 лістапада ён быў прыняты ў першым чытанні. Каментуючы гэтыя змены мы прыйшлі да высновы, што ўзмацненне адказнасці можа сведчыць як аб павелічэнні колькасці «ухілістаў», так і насіць прэвентыўны характар.
Пагадзіцеся, дзіўная сітуацыя. Калі ў вас «аншлаг у ваенных камісарыятах», то навошта тады ўзмацняць адказнасць для «ўхілістаў»? Бо для падрыхтоўкі законапраекта чыноўнікам з МА РБ прыйшлося падрыхтаваць стос дакументаў, прыдумаць нейкае абгрунтаванне, узгадніць законапраект з іншымі ведамствамі і інш. Калі ўсё добра працуе, то навошта патрэбныя лішнія рухі цела? Ды і афіцыйная статыстыка колькасці крымінальных справаў супраць «ухілістаў» паказвае іх памяншэнне ў параўнанні з 2022 годам амаль у два разы.
А ці ўсё так цудоўна і выдатна з заклікам у Беларусі, як дакладаюць прапагандысты? Раней мы прыводзілі прыклад Воранаўскага раёна Гродзенскай вобласці, дзе паводле інфармацыі ваенкамата 30% прызыўнікоў не зʼявіліся на мерапрыемствы прызыву, бо знаходзяцца за мяжой.
У сухой рэштцы словы прапагандыстаў дыяметральна разыходзяцца са зменамі заканадаўства. Як тут давяраць тэзе пра натоўп ахвотных служыць у войску, калі паралельна адбываецца закручванне гаек для «ўхілістаў».
