In English:
Four lecturers dismissed from the BSU Faculty of Law «according to the lists»
На русском языке:
С юрфака БГУ «по спискам» уволили 3-х преподавателей
Тэлеграм-канал «Law Verum» паведамляе, што з юрыдычнага факультэта БДУ былі звольненыя «па спісах» чацвёра выкладчыкаў, сярод якіх двое дактароў юрыдычных навук:
- Гаўрыльчанка Юлія Пятроўна — доктар юрыдычных навук, прафесар кафедры гаспадарчага права. Адна з заснавальнікаў магістратуры па айці-праве.
- Тамашэўскі Кірыл Леанідавіч — доктар юрыдычных навук, прафесар кафедры грамадзянскага працэсу і працоўнага права.
- Пратасавіцкі Сяргей Пятровіч — кандыдат юрыдычных навук, дацэнт кафедры грамадзянскага права. Адзін з аўтараў каментара да Грамадзянскага кодэкса, які вывучаецца ўсімі студэнтамі-юрыстамі.
- Аўдзеева Таццяна Уладзіміраўна — старшы выкладчык кафедры грамадзянскага права. Адна з заснавальнікаў гуртка па грамадзянскім праве, вучоны ў сферы грамадзянска-прававой адказнасці.
Абноўлена: Law Verum паведамляе, што інфармацыя аб звальненні выкладчыка юрфака БДУ, кандыдата юрыдычных навук Сяргея Пратасавіцкага з’яўляецца недакладнай.
«На дадзены момант ён усё яшчэ значыцца як выкладчык кафедры ГП. Спадзяёмся, што адміністрацыя ўніверсітэта не дадумаецца пазбавіць сябе аднаго з наймацнейшых спецыялістаў сваёй справе», — удакладняе тэлеграм-канал Law Verum.
У канцы студзеня пра звальненні з юрфака паведаміў вядомы юрыст Дзмітрый Лаеўскі, чыю маці Алену Лаеўскую таксама звольнілі з факультэта. Акрамя таго, у 2020-21 гг. працы на факультэце пазбавіліся выкладчыкі: Яраслаў Кот і Алена Басалай.
«Гэта вопытныя спецыялісты высокага ўзроўню (усіх ведаю асабіста). Яны нічога крамольнага не рабілі — проста мелі сваё меркаванне, былі сумленныя са студэнтамі, вучылі праву, а не хадзіць строем. Некаторыя вясной мінулага года падтрымалі маю маці, калі яе незаконна звальнялі ў сувязі з маёй працай па абароне людзей. Звальненні ў БДУ не адбываюцца без удзелу ўпраўлення прававой працы. Як мы высветлілі ў ходзе суда па аспрэчванні незаконнага звальнення, кіруе ўпраўленнем прававой работы Швакова Алена Мікалаеўна — жонка Швакова Аляксея Іванавіча, які ў якасці старшыні Мінскай гарадской калегіі адвакатаў адыграў важную ролю ў пазбаўленні прафесіі многіх адвакатаў у 2021 годзе», — пісаў ён.
