На русском языке:
Журналист-расследователь Карпеко: «Халип взяла эту информацию, скопировала её и выдала расследование»
Пару дзён таму мы пісалі, што расійскае выданне «Новая Газета. Еўропа» апублікавала плагіят матэрыялаў беларускіх выданняў, а ў адказ на заўвагі галоўны рэдактар Кірыл Мартынаў сказаў: «Я бачыў гэтую прэтэнзію, але ў дадзеным выпадку займаю бок аўтара».
Гаворка ідзе пра расследаванне журналісткі Ірыны Халіп пад назвай «ПАП са смыкам» пра першую беларускую ЧОП – кампанію ТАА «ГардСэрвіс». На публікацыю звярнуў увагу журналіст-расследавальнік Аляксей Карпека, які паведаміў, што «тэкст уяўляе сабой рэрайт двух расследаванняў выдання «Еўрарадыё» і змяшчае шэраг памылак.
На гэтым гісторыя не скончылася, Мартынаў у каментарах абвінаваціў Аляксея Карпеку ў хамстве і выказаў меркаванне, што ён хлусіць, а таксама абгрунтаваў сваю пазіцыю аўтарытэтам Ірыны Халіп і галоўнага рэдактара «Новой Газеты» Дзмітрыя Муратава. Аляксей Карпека, у сваю чаргу, абвінаваціў Мартынава ў тым, што той падмяняе журналісцкія стандарты кумаўством, і адзначыў, што Ірына Халіп – заангажаваная журналістка.
Выданне Reform.by звязалася з Аляксеем, каб удакладніць дэталі, што менавіта кажа пра тое, што тэкст Халіп – плагіят.
«Скажам так, прама плагіят – на працэнтаў 80, упэўнены. Тое, што Халіп перапісала мае матэрыялы – упэўнены працэнтаў на 95. У тым, што яна брала кавалкі з расследаванняў, апублікаваных Еўрарадыё – на 95. Бо там вельмі шмат супадзенняў. […] Першапачаткова ў артыкуле Халіп увогуле спасылак на «Еўрарадыё» не было. Хаця мы былі першымі, хто ўвогуле звязаў гэта ўсё, паказаў, і гэтак далей. І як бы, ну, гэта трошачкі дзіўна рабіць расследаванне на гэтую тэму і не наткнуцца на наш тэкст. Спасылку яны ўжо паставілі, і бог з імі».
Акрамя таго, Карпека зважае і на шэраг грубых памылак у тэксце, да прыкладу, тое, што да зброі:
«Там проста ў тэксце ёсць спасылка на ўказ МУС. У якім ёсць табліца баявой зброі, якой павінен быць укамплектаваны «ГардСэрвіс» – баявой зброяй. Не службовым, не нейкім іншым. Калі б яна чытала гэты ўказ, а не ўзяла інфармацыю пра службовую зброю са старых тэкстаў, дзе гаворыцца пра службовую зброю, то гэтай памылкі б не было. Бо калі выходзілі мае тэксты, то яшчэ ніхто не бачыў гэтага ўказу, яго банальна яшчэ не было», – сказаў журналіст.
Расследавальнік таксама выказаў здзіўленне наконт пазіцыі, якую заняў Кірыл Мартынаў.
«Сапраўды смяхотная сітуацыя, калі яму прама паказваюць на крыніцы, дзе Халіп узяла гэтую інфармацыю, скапіявала яе і выдала расследаванне. Смешна, але акей. Але яны нават не гатовы выпраўляць факталагічныя памылкі. Ён абраў такую тактыку. Мне здаецца яна дурной. Але гэта ягонае права. Тапіць да канца, пагражаць судом, яшчэ нечым», – сказаў Карпека.
