Эканаміст BEROC Леў Львоўскі напісаў пост на сваёй старонцы ў Facebook, у якім адказаў усім, хто заклікае адмяніць санкцыі супраць рэжыму ў Беларусі. Прыводзім яго словы без зменаў.
Апошнім часам часта сустракаю пазіцыю «адмяняйце санкцыі — яны толькі забіваюць эканоміку і штурхаюць Лукашэнку ў абдымкі Расеі». Прычым транслююць яе на здзіўленне розныя групы: лукашысты «а-ля Мінскі дыялог», маргіналы «а-ля Зянон» і цалкам годныя людзі «а-ля Мацукевіч».
Мне здаецца, гэта меркаванне ўключае ў сябе шэраг лагічных памылак і памылковых дапушчэнняў.
Першае
Яно прадугледжвае, што ўвядзеннем санкцый кіруе апазіцыя. На практыцы мы бачым, што, нягледзячы на ўсе яе намаганні, ЕС і ЗША вельмі неахвотна ішлі на ўвядзенне абмежаванняў. Да пэўнага моманту пастаянныя заявы аб занепакоенасці перамяжоўваліся кропкавымі мерамі ў дачыненні да вузкага кола асоб. Пераломным момантам стала пасадка самалёта Ryanair, на што ні НАУ, ні штаб Ціханоўскай ніяк не маглі паўплываць.
Што маем у выніку: першапрычынай ўвядзення любых маштабных санкцый заўсёды з’яўляюцца дзеянні асабіста Лукашэнкі і яго світы.
Урады дэмакратычных краін рэагуюць на спадзевы сваіх грамадзян. Калі апошнія абураныя новым трэшам Лукашэнкі — палітыкі прымаюць меры. Калі ўявіць, што ён выпускае палітвязняў і сядае за стол перамоваў, то ніякія «злыя» апазіцыйныя дзеячы не змогуць вымаліць ні грама санкцый — рэагаваць не будзе на што.
Другое
Гэтая ідэя прадстаўляе Аляксандра Лукашэнку не суб’ектам, а аб’ектам палітыкі. Маўляў ён — статычная фігура, якая ніяк не можа памяняцца. «Ён такі, які ёсць, і, раз на яго накладаюць санкцыі, ён не адкарэктуе свае паводзіны, а, як бязвольны шарык для пінг-понга, абавязкова пакоціцца ў бок Масквы».
Што зусім не так. Лукашэнка — вопытны палітык, практычна PhD па манеўрам і сядзенні адначасова на чатырох крэслах. Ён умее паказваць зубы Маскве і ўсміхацца Захаду, калі яму гэта выгадна.
Трэцяе
Прыхільнікі гэтага меркавання не ўлічваюць амбіцыі Лукашэнкі. Быць дыктатарам суверэннай краіны і губернатарам Паўночна-Заходняга краю — адчувальна розныя пазіцыі.
