На русском языке:
«98 рублей, но не всем». Материальная помощь для подготовки к школе в Беларуси: сколько, кому и как её получить?
Учора мы звярнуліся да беларускіх бацькоў з просьбай распавесці, як выглядае фінансавая падтрымка сем’яў з дзецьмі ў Беларусі – каму яе вылучаюць, што для гэтага неабходна зрабіць, і якія сумы гэтай дапамогі. Дзякуючы вам у нас атрымалася сабраць поўныя звесткі па гэтым пытанні, і вось, што стала вядома.
▪️ Каму выдзяляецца фінансавая падтрымка ў Беларусі, і колькі выплачваюць?
Матэрыяльная дапамога для падрыхтоўкі дзяцей да школы належыць шматдзетным сем’ям, у якіх трое ці больш дзяцей. На кожнае дзіця належыць 30% ад бюджэту пражытачнага мінімуму (БПМ), які на 1 жніўня 2022 г. склаў 328,5 руб, гэта значыць падтрымка — 98,55 рублёў на кожнае дзіця.
▪️ Што неабходна зрабіць, каб яе атрымаць?
Трэба сабраць пакет дакументаў, у які ўваходзяць:
1. Даведка аб складзе сям’і (дзеці да 18 гадоў на момант выплаты);
2. Пасведчанні аб нараджэнні дзяцей;
3. Пасведчанне шматдзетнай сям’і;
4. Даведка са школы (пра тое, што дзіця там навучаецца);
5. Пашпарт;
6. Заява (складаецца ў дзень звароту).
Акрамя таго, трэба адкрыць разліковы рахунак у «Беларусбанку». Усе гэтыя дакументы прадастаўляюцца ва ўстанову адукацыі да 15 верасня.
▪️ Якая яшчэ падтрымка пакладзена шматдзетным сем'ям?
Зніжка 50% на аплату падручнікаў — заплаціць трэба будзе 8 рублёў замест 16. Для атрымання такой ільготы таксама трэба прадставіць у школу копію пасведчання шматдзетнай сям’і і напісаць заяву на імя дырэктара.
«На аплату падручнікаў 50% скідка. Харчаванне дзіцяці ў групе падоўжанага дня бясплатна. Адпраўлялі ўлетку дзіця ў летні аздараўленчы лагер ад прадпрыемства мужа — пуцёўка бясплатная», — распавядаюць бацькі.
▪️ А ці ёсць нейкая дапамога для сем'яў з 1-2 дзецьмі? Так, але тут шмат нюансаў
Падручнікі бясплатна прадастаўляюцца дзецям-інвалідамі, дзецям з апякунскіх сем’яў і дзецям, у якіх бацькі зʼяўляюцца інвалідамі І або ІІ групы.
Бясплатнае харчаванне пакладзена дзецям з малазабяспечаных і шматдзетных семʼяў, дзецям-інвалідам, вучням 5-11-х класаў сельскіх школ, дзецям з семʼяў, дзе адзін з бацькоў – інвалід I або II групы, а таксама дзецям, якія знаходзяцца ў сацыяльна-небяспечным становішчы. Таксама бясплатна харчавацца ў школе могуць дзеці вайскоўцаў, супрацоўнікаў АУС, ветэранаў-інвалідаў вайны ў Афганістане.
Бацькі пішуць, што можна атрымаць і разавую дапамогу ад прафкама дзяржпрадпрыемства, калі ў ім знаходзіцца, але ўсюды розныя сумы.
«Да прыкладу, у Мінскэнерга звычайным семʼям плацяць 2 Б.В. ад кіраўніцтва прадпрыемства, а шматдзетным – 4 Б.В. – дзве ад кіраўніцтва і дзве ад прафсаюза. Дакументы простыя: даведкі са школы, пасведчанне аб нараджэнні, заява», – пішуць бацькі.
Да ўсяго вышэйсказанага можна аднесці і адрасную сацыяльную дапамогу для малазабяспечаных (і шматдзетных) семʼяў. Памер выплаты назначаецца ў ходзе пасяджэння спецыяльнай камісіі пры мясцовым выканкаме, дзе індывідуальна ацэньваюць фінансавае становішча і жыццёвую сітуацыю сямʼі.
Каб атрымаць такую дапамогу, трэба звярнуцца ў выканаўчы і распарадчы орган па месцы жыхарства або орган па працы, занятасці і сацыяльнай абароне ў сваім раёне.
