На русском языке:
Обзор основных событий беларусской пропаганды о войне в Украине за 27 апреля от Гаюна
Беларускі Гаюн апублікаваў агляд аб дзейнасці беларускай прапаганды на тэму вайны з Украінай за 27 красавіка.
Вайна ва Украіне вядзецца краінамі Захаду, каб аслабіць Расію для наступнага падзелу на некалькі асобных дзяржаў. З такой думкай выступіў дэпутат Палаты прадстаўнікоў Андрэй Савіных:
«Для Захаду нічыя (у вайне Расіі і Украіны) — таксама добры вынік. Ім трэба зацягваць вайну. Зразумела, што Украіна будзе разбурана. Але іх цікавасць — выматаць Расію, а ў лепшым выпадку — прывесці да яе разбурэння, да расколу на некалькі дзяржаў».
«Вайна ва Украіне — гэта не канфлікт паміж дзвюма краінамі. Расія ваюе з Захадам, а дакладней з "транснацыянальнымі сеткавымі арганізацыямі, якія складаюцца з фінансавых і лічбавых карпарацый, і якія фінансуюць і кантралююць урады цэлага шэрагу (Заходніх) краін».
«У дачыненні да Расіі развязана гібрыдная вайна, якая ўключае тры кампаненты. Расію справакавалі на ваенную аперацыю ва Украіне. Калі б Расія не пачала, то пачалі б іншыя і ахвяр было б больш. Супраць Расіі развязана эканамічная вайна праз санкцыі і кагнітыўная вайна».
Падобным чынам выказаўся і старшыня ГА «Беларускае таварыства «Веды» Вадзім Гігін:
«Яны (палітыкі Вялікабрытаніі) будуць шпігаваць нацысцкі рэжым Зяленскага зброяй да апошняга. Іх галоўная задача зараз — нанесці максімальна балючы ўдар па Расіі».
Пасля адсутнасці хуткага і адчувальнага поспеху на фронце прыходзіцца ладзіць «танцы з бубнамі», і постфактум тлумачыць марфалогію ідучай трэці месяц вайны.
Наратыў «увесь свет ваюе супраць Расіі» надзвычай важны і выгадны, паколькі дазваляе апраўдаць як няўдачы на фронце, так і пагаршэнне эканамічнага становішча ад уведзеных санкцый. Размова ідзе не толькі аб абароне рускамоўнага насельніцтва Данбаса, але і аб выжыванні цэласнай Расіі. Адпаведна, Расія не пачала вайну супраць Украіны, а нанесла прэвентыўны ўдар. Бо без яго «вайну пачалі б іншыя». Хто такія гэтыя «іншыя» — не ўдакладняецца. У якасці гіпотэзы можна выказаць здагадку, што «іншыя» — гэта адсылка да серыяла «Lost».
Паколькі без пачатку Расіяй вайны ахвяраў усё роўна было б больш, то наяўныя ваенныя і тэхнічныя страты можна без згрызотаў сумлення «спісаць з бухгалтарскага балансу». Прапагандысты разумеюць разбурэнне эканомікі і інфраструктуры Украіны, якое адбываецца свядома, як спосаб вядзення вайны. Падумаеш, краіну разбурылі! «Лес сякуць — трэскі ляцяць».
Можна адзначыць з’яўленне тэрміна «кагнітыўная вайна». Спікер не раскрыў у сваім выступе, што пад ім маецца на ўвазе. На сайце БелТА практычна адсутнічае згадка тэрміна «кагнітыўная вайна». Таму можна канстатаваць, што беларуская прапаганда нячаста выкарыстоўвае дадзены тэрмін. Ёй усё ж бліжэй не такая мудрагелістая і менш навамодная «інфармацыйная вайна».
На «нацысцкім рэжыме Зяленскага» спыняцца не будзем, бо гэта стандартнае для беларускай прапаганды вызначэнне. Праўда, ёсць нюанс: як антыфашысцкі Мазырскі НПЗ паспяхова прадаваў салярку нацысцкаму ўкраінскаму рэжыму, якая запраўлялася ў баявыя машыны нацбатаў? Пытанне рытарычнае.
Беларускія чыноўнікі і прапагандысты працягваюць са сваіх бронецягнікоў даказваць, што вайна — гэта мір.
Агляд падрыхтаваны маніторынгавай камандай Праекта Беларускі Гаюн
