Анлайн-гіпермаркет amd.by ужо тыдзень не працуе пасля праверкі з-за ўказу Лукашэнкі «Аб падтрымцы эканомікі»

Чытачы motolko.help паведамляюць, што ўжо амаль тыдзень не працуе адна з буйных анлайн-крам amd.by. На сайце з’явілася апавяшчэнне: «Сайт часова не прымае замовы па загадзе 06-18-6/1571 ад 15.12.2021г. На падставе пункта 20 Указа Прэзідэнта Рэспублікі Беларусь ад 24 красавіка 2020 г. нумар 143 «Аб падтрымцы эканомікі».

У гэтым пункце ўказа гаворыцца, што для аператыўнага выяўлення і спынення парушэнняў заканадаўства могуць назначацца пазапланавыя праверкі, якія, у выпадку выяўлення парушэнняў, могуць прыпыніць работу гандлёвага аб’екта на тэрмін да 90 дзён.

Паведамленне на сайце amd.by / motolko.help

Такім чынам, можна меркаваць, што работа інтэрнэт-гіпермаркета спыненая менавіта ў выніку пазапланавай праверкі. Адзначым, што сацсеткі кампаніі не абнаўляюцца ўжо з 16 снежня.

Акрамя таго, варта звярнуць увагу, што на сайце, у раздзеле «Самавываз», напісана, што ўсе пункты выдачы тавараў на дадзены момант «часова не працуюць», а каля некаторых з’явіўся надпіс «памяшканне OZON».

Пункты самавывазу на сайце amd.by / motolko.help

На гэта ж звярнуў увагу і адзін з карыстальнікаў у Twitter, які паведаміў, што на адным з пунктаў самавывазу amd.by на Партызанскім праспекце з’явілася шыльда расійскай інтэрнэт-крамы.

Раньше на Партизанском возле дома была точка самовывоза https://t.co/G0i3AIB6Ne. Проходила на днях, а там уже вывеска ozon. Чувствую, нелегко будет нашим интернет магазинам.

— Килька Грозная (@KilkaGroznaya) December 12, 2021

Дапоўнена 16:10: Выданне Officelife піша, што з крамай усё ў парадку. Па іх інфармацыі, сайт не працуе па тэхнічных прычынах і зараз замову можна пакінуць па тэлефоне.

Таксама некаторыя чытачы паведамляюць, што сёння крама прымала замовы, але толькі з дастаўкай, таксама тавары дастаўляюць пры замове праз onliner. Акрамя таго, чытачы пацвярджаюць інфармацыю, што ўсе пункты самавывазу на дадзены момант знаходзяцца на рамонце.