Аператар аэрапорта Тбілісі адмовіўся абслугоўваць самалёты «Белавія»: што гэта значыць?

Shutterstock
Абноўлена
Абноўлена: 17 лютага 2023 18:45
15 хв.

На русском языке: Оператор аэропорта Тбилиси отказался обслуживать самолёты «Белавиа»: что это означает?

Рэдакцыя motolko.help атрымала інфармацыю, што турэцкі міжнародны аператар аэрапортаў TAV Airports адмовіўся абслугоўваць самалёты авіякампаніі «Белавія» ў аэрапорце Тбілісі імя Шота Руставелі. Нагадаем, што напрыканцы студзеня WSJ паведаміла, што ЗША запатрабавалі ад Турцыі забараніць палёты ў краіну авіякампаніям з РБ і РФ на самалётах Boeing.

Дапоўнена: 24 студзеня грузінскае выданне agenda.ge паведаміла, што французскі аператар аэрапортаў Groupe ADP выкупіў акцыі TAV Airports, а разам з тым і мясцовае аддзяленне – TAV Georgia. Такім чынам дакладна невядома, ад каго менавіта паступіла адмова абслугоўваць самалёты «Белавія» ў аэрапорце Тбілісі: ад TAV ці ад Groupe ADP.

Пазней, 1 лютага, турэцкія выданні паведамілі, што авіяаператар Havaş, які з’яўляецца даччынай кампаніяй TAV Airports, папярэдзіў авіякампаніі з Беларусі, РФ і Ірана, што яны не будуць абслугоўваць самалёты Boeing і шэраг Airbus. Паведамлялася, што ў «чорны спіс» на абслугоўванне трапіла больш за 170 самалётаў, сем з якіх — беларускія, гэта значыць «Белавіі».

Што значыць «не будуць абслугоўваць»?

Гэта азначае, што калі, да прыкладу, адзін з сямі самалётаў «Белавія» прыляціць у аэрапорты, якія абслугоўвае Havaş, то гэты аператар не будзе іх запраўляць, падаваць трап, праводзіць пасля і перадпалётны агляд, тэхабслугоўванне і рамонт. Але гэта не значыць, што самалётам цяпер забаронена прылятаць у гэтыя лётныя гавані.

І адразу яшчэ адзін момант: аэрапорт Тбілісі не ўваходзіць у спіс аэрапортаў Havaş. Яго аператар — галоўная турэцкая кампанія TAV Airports. Гэта можа азначаць, што забарона на абслугоўванне будзе пашырана на ўсе аэрапорты, дзе аператарам выступае TAV ці яе даччыныя кампаніі.

Ці шмат аэрапортаў у зоне адказнасці TAV?

Паводле сайта Havaş, яны з’яўляюцца аператарамі 32-х аэрапортаў, большасць з якіх знаходзіцца ў Турцыі. Непасрэдна TAV Airports кіруе яшчэ пятнаццаццю аэрапортамі ў васьмі краінах, і яны значна буйнейшыя.

Аператар аэрапорта Тбілісі адмовіўся абслугоўваць самалёты «Белавія»: што гэта значыць?

Карта аэропортаў, якія знаходзяцца пад кіраваннем Havaş / havas.net

Іншымі словамі, «Белавіі» адмаўляе ў абслугоўванні галоўны аператар як мінімум 47-і аэрапортаў. Калі ж выдзеліць самыя буйныя з іх, то ў абслугоўванні будзе адмоўлена ў аэрапортах такіх гарадоў, як

— Стамбул, Анкара і Анталія;

— Тбілісі і Батумі;

— Манасцір;

— Скоп’е;

— Медзіна;

— Рыга;

— Заграб;

— Алматы;

Але нехта ж будзе запраўляць там іх самалёты?

Так, але калі змогуць дамовіцца. Напрыклад, у Тбілісі па сённяшні дзень самалёты «Белавія» будуць абслугоўваць прадстаўнікі авіякампаніі Georgian Airways. Але, па-першае, гэта пэўныя нязручнасці для «Белавіі». Па-другое, якасць абслугоўвання можа пагоршыцца. Па-трэцяе, у нейкіх аэрапортах яны проста не знойдуць замены TAV і не змогуць туды лятаць.

Папярэдні матэрыял
Ізраільская група кібернаёмнікаў «адмывала» ў сацсетках Аляксандра Зінгмана і дапамагала выбудоўваць яму пазітыўны імідж у Афрыцы
Наступны матэрыял
Жыхары Гомеля знайшлі ў рацэ зуб маманта

Iншыя матэрыялы