«Дапамажыце сабе – пакажыце Бабарыку». Святлана Ціханоўская звярнулася да памагатых Лукашэнкі

Офіс Святланы Ціханоўскай
6 хв.

На русском языке: «Помогите себе – покажите Бабарико». Светлана Тихановская обратилась к пособникам Лукашенко

Сёння нацыянальная лідарка Святлана Ціханоўская звярнулася да памагатых Лукашэнкі і нагадала, што месца ў самалёце на ўсіх не хопіць.

Прыводзім яе прамову цалкам:

«На днях з’явіліся страшныя навіны пра тое, што Віктар Бабарыка паступіў у лякарню са слядамі збіцця. Кажуць, супрацоўнікі бальніцы нават не змаглі апазнаць яго знешне, пакуль не ўбачылі дакументы. Адвакат Віктара Дзмітрыевіча яшчэ раней быў пазбаўлены ліцэнзіі. І да гэтага часу ні адвакаты, ні сваякі не могуць убачыць, у якім ён цяпер стане. На дадзены момант месцазнаходжанне Віктара Бабарыкі невядомае.

Сітуацыя з Віктарам Дзмітрыевічам — не адзіная. Вось ужо месяц асабіста ў мяне няма ніякіх навінаў пра Сяргея і няма інфармацыі пра стан яго здароўя. Сяргей пазбавіўся пятага адваката, якога таксама як і астатніх адвакатаў палітычных зняволеных, пазбавілі права на прафесію. Ён застаўся без сувязі са знешнім светам.

Маша Калеснікава перанесла ў зняволенні складаную аперацыю, і абставіны да гэтага часу невядомыя. У цяперашні час даведацца пра стан яе здароўя мы не можам — адвакатаў да яе не дапускаюць, лісты не перадаюць.

75 дзён ніхто не бачыў і Мікалая Статкевіча. Цяпер ён утрымліваецца ў штрафным ізалятары. З ім няма ніякай сувязі. Міжнародным правам гэта прызнаецца як катаванні.

Эдуард Бабарыка ўжо больш за два месяцы знаходзіцца ў турэмным шпіталі. І мы не ведаем, у якім ён стане і ці аказваецца яму належная медыцынская дапамога.

З лютага 2023 года нічога не вядома пра Максіма Знака і Ігара Лосіка. Сваякі не могуць нічога даведацца пра стан іх здароўя. З сакавіка да іх не могуць патрапіць адвакаты.

Усе гэтыя людзі апынуліся ў сітуацыі, калі яны не маюць ніякіх кантактаў са знешнім светам. І менавіта таму цяпер мы нічога пра іх не ведаем.

«Дапамажыце сабе – пакажыце Бабарыку». Святлана Ціханоўская звярнулася да памагатых Лукашэнкі

Памагатыя Лукашэнкі сёння не ўсведамляюць наступствы гэтага ціску на палітвязняў. Зразумейце, пры любой змене сітуацыі, Лукашэнка будзе ратаваць толькі сябе. Калі прыйдзе час несці адказнасць, кожны, хто зараз яго акружае, апынецца сам па сабе.

Сам па сабе будзе Маткін Алег Уладзіміравіч, кіраўнік Дэпартамента выканання пакаранняў, на якога Лукашэнка зваліць усю паўнату адказнасці за нечалавечыя ўмовы, у якіх утрымліваліся палітвязні.

Сам па сабе будзе Швед Андрэй Іванавіч, генеральны пракурор, які будзе расплачвацца за ўсе абвінавачанні і запрошаныя тэрміны.

Сам па сабе будзе Гара Дзмітрый Юр’евіч, старшыня Следчага Камітэта Беларусі, бо Лукашэнка не заступіцца за яго, калі ўсе гэтыя расследаванні справядліва назавуць сфабрыкаванымі.

Не заступіцца ён і за Сукалу Валянціна Алегавіча і Міклашэвіча Пятра Пятровіча, калі паўстане пытанне пра тое, а чым быў заняты Вярхоўны і Канстытуцыйны суд, пакуль у краіне знішчалі закон.

У вельмі складанай сітуацыі апынецца Кубракоў Іван Уладзіміравіч, бо за шматразовае перавышэнне паўнамоцтваў, катаванні і смерці звычайных грамадзянаў, якія адбыліся следам, нехта павінен будзе адказаць. І Лукашэнка зробіць усё, каб гэта быў не ён адзін.

Так, вы заўважылі, што я назвала не ўсе імёны, але ўсё ж я хачу, каб гэта пачуў кожны і кожная, хто да гэтага часу застаецца ў сістэме. Перамены ўсё роўна адбудуцца, але месцаў у самалёце не хопіць на ўсіх. Лукашэнка не будзе вас ратаваць. А Пуціну ўжо не да вас, калі вы на яго разлічвалі.

Толькі вы самі можаце сабе дапамагчы. Пачынайце рабіць гэта зараз. Выходзьце з намі на сувязь. Дзяліцеся інфармацыяй.

Сярод вас ёсць тыя, хто можа дапамагчы Віктару Бабарыку на месцах. Пакажыце яго цяперашні стан.

Паўплывайце на допуск адвакатаў і сваякоў да палітвязняў, каб яны маглі асабіста даведацца пра стан іх здароўя і пераканацца ў аказанні ім медыцынскай дапамогі.

Зрабіце гэта: не толькі дзеля сваёй будучыні, але і дзеля таго, каб заставацца чалавекам».

Папярэдні матэрыял
Вучэнні УС РБ/РФ у Беларусі прадоўжаныя мінімум да 8 траўня
Наступны матэрыял
5 серыялаў у якаснай беларускамоўнай агучцы, якія можна паглядзець прама зараз

Iншыя матэрыялы