На русском языке:
На вооружение Сил специальных операций Беларуси поступят «Грады»?
6 ліпеня тэлеграм-канал 72-га абʼяднанага навучальнага цэнтра (далей – 72-ы анц) апублікаваў пост пра заняткі па спецыяльнай падрыхтоўцы ў 3-й школе падрыхтоўкі спецыялістаў танкавых і артылерыйскіх падраздзяленняў. Адзначалася, што «будучыя спецыялісты ўстаноўкі БМ-21 адпрацоўваюць нарматывы па рабоце ў разліках».
На апублікаваных фота можна заўважыць, што частка вайскоўцаў апранутая ў майкі зялёнага (ахоўнага) колеру, а частка – у цяльняшкі.
Адзначым, што ўказам ад 17.03.2020 № 100 быў зацверджаны Пералік прадметаў ваеннай формы адзення. Так, сярод прадметаў ваеннай формы адзення ваеннаслужачых тэрміновай службы пазначаны:
- Фуфайка ахоўнага колеру (для вайскоўцаў Сіл спецыяльных аперацый (ССА) – фуфайка нацельная з палосамі блакітнага і белага колеру).
- Футболка ахоўнага колеру (для вайскоўцаў ССА – майка нацельная з палосамі блакітнага і белага колеру).
Іншымі словамі, цяльняшка зʼяўляецца элементам ваеннай формы адзення ваеннаслужачых тэрміновай службы, якія праходзяць службу менавіта ў ССА. З гэтага можна зрабіць выснову, што ў ССА плануецца фарміраванне артылерыйскага падраздзялення, якое будзе мець на ўзбраенні рэактыўную сістэму залпавага агню (далей – РСЗА) «Град». Верагодней за ўсё, менавіта для гэтых мэт у 72-м навучальным цэнтры ўжо пачалі падрыхтоўку спецыялістаў.
Даведачна. Паводле дадзеных сайта МА РБ, 3-я школа падрыхтоўкі спецыялістаў танкавых і артылерыйскіх падраздзяленняў 72-га анц рыхтуе камандзіраў 122-мм. РСЗА «Град» (БМ-21).
Улічваючы сярэднія тэрміны навучання курсантаў у 72-м анц можна чакаць зʼяўленне падраздзялення з РСЗА «Град» у ССА ўжо восенню 2023 года. Можна меркаваць, што будуць сфарміраваныя рэактыўныя артылерыйскія батарэі ў складзе змешаных артылерыйскіх дывізіёнаў брыгад ССА.
Такім чынам, агнявая моц артылерыйскіх падраздзяленняў ССА павялічыцца. У цяперашні час на ўзбраенні ССА маюцца мінамёты (82 мм. 2Б24 і 120 мм. 2Б23 «Нона-М»), а таксама 122 мм. гаўбіцы Д-30.
Адзначым, што ў пачатку 2023 года ў 51-й артылерыйскай брыгадзе таксама была сфарміравана рэактыўная артылерыйская батарэя на РСЗА «Град».
