На русском языке:
Первые учения с территориальной обороной в 2024 пройдут в Вороновском районе
У найбліжэйшы час у Воранаўскім раёне (Гродзенская вобл.) павінны прайсці вучэнні з тэрытарыяльнай абаронай (ТРА). Да такой высновы можна прыйсці на падставе аналізу дзяржаўных закупак, якія ў апошні час праводзіліся райвыканкамам.
Так, у лютым Воранаўскі райвыканкам закупляў крэм шавецкі, іголкі для ручнога шыцца і ніткі. Таксама ў сакавіку набываліся балаклавы. Закупка падобных тавараў характэрна пры падрыхтоўцы да правядзення вучэнняў з ТРА.
Вучэнні з ТРА звычайна ўключаюць у сябе заклік рэзервістаў з запасу і іх падрыхтоўку па ваенна-ўліковых спецыяльнасцях. Усё завяршаецца правядзеннем камандна-штабных вучэнняў.
Колькі для ўдзелу ў вучэннях з запасу будзе прызвана рэзервістаў – невядома. Мяркуючы па колькасці іголак, якія закупляліся райвыканкамам, усяго будзе прызвана не менш за 83 чалавекі.
Дакладныя тэрміны правядзення вучэнняў пакуль не называліся. Можна меркаваць, што яны пройдуць на працягу сакавіка-красавіка.
Адзначым, што тэрыторыя Воранаўскага раёна мяжуе з Літвой. Раён адметны сваім этнічным складам. Паводле перапісу 2019 г., 76,7% жыхароў раёна лічаць сябе палякамі.
Нагадаем, што ў 2023 г. у Гродзенскай вобласці вучэнні з ТРА праводзіліся ў Карэліцкім і Навагрудскім раёнах. Усяго ж летась вучэнні з ТРА прайшлі ў дванаццаці рэгіёнах Беларусі. На іх з запасу было прызвана 1287 рэзервістаў.
