In English:
Gutseriyev’s sanctioned plane flew to London twice in January
На русском языке:
Самолёт Гуцериева под санкциями дважды прилетал в Лондон в январе
Брытанскае выданне iNews апублікавала расследаванне, у якім высветлілася, што падсанкцыйны самалёт Міхаіла Гуцэрыева двойчы ў студзені прылятаў Лондан. Аднак брытанскія ведамствы заявілі, што ніякіх санкцыяў парушана не было.
17 і 31 студзеня 2022 года самалёт Міхаіла Гуцэрыева Embraer ERJ-135BJ Legacy з рэгістрацыйным нумарам P4-MSG прылятаў у лонданскі аэрапорт Лутон, правёўшы агулам сем дзён на тэрыторыі Вялікабрытаніі. І гэта нягледзячы на тое, што 9 жніўня 2021 года гэты борт трапіў пад санкцыі Вялікабрытаніі, дзе гаварылася, што краіна не будзе аказваць тэхнічную дапамогу шэрагу самалётаў рэжыму і Гуцэрыева.
Гуцэрыеў быў названы ў апавяшчэнні аб санкцыях «даўнім паплечнікам» Лукашэнкі, які праз свае дзелавыя інтарэсы аказваў падтрымку рэжыму ў Беларусі, які абвінавачваецца ў цэлым шэрагу парушэнняў правоў чалавека.
Міністэрства замежных спраў па справах Садружнасці і Развіцця (FCDO) пацвердзіла, што санкцыі ў дачыненні да самалёта заставаліся ў сіле цягам сямі дзён, пакуль ён знаходзіўся ў Вялікабрытаніі. Аднак крыніцы iNews ва ўрадзе адмовіліся паведаміць, ці падвяргаўся самалёт якім-небудзь прымусовым мерам у гэты перыяд.
Самалёт Міхаіла Гуцэрыева Embraer ERJ-135BJ Legacy з рэгістрацыйным нумарам P4-MSG / JetPhotos
iNews піша, што падраздзяленне Міністэрства фінансаў, якое адказвае за забеспячэнне захавання санкцый Вялікабрытаніі, разгледзела інфармацыю, прадстаўленую беларускімі актывістамі аб тым, што ў Лондан прыляцеў падсанкцыйны самалёт, і вырашыла, што «ніякіх парушэнняў фінансавых санкцый у дачыненні да гэтага самалёта не адбылося».
«Не падобна, што Вялікабрытанія сапраўды мае намер выконваць санкцыі, якія яна ўводзіць, замест гэтага яна проста аб’яўляе аб гэтых санкцыях, каб выглядаць добра», — сказаў прадстаўнік Прафесійнага саюза беларусаў у Вялікабрытаніі (PUBB).
Выданне паспрабавала ўдакладніць у брытанскіх ведамстваў ці будуць такія дзеянні, як дазапраўка або ўзлёт і пасадка ў аэрапорце, кваліфікаваныя як «тэхнічная дапамога», якую Вялікабрытанія абавязвалася не аказваць бартам Гуцэрыяў. Аднак ні FCDO, ні міністэрства фінансаў не адказалі на запыты, а Міністэрства транспарту заявіла, што не каментуе ўвядзенне санкцый супраць канкрэтных самалётаў.
8 лютага беларускія актывісты атрымалі ліст ад Упраўлення па ажыццяўленні фінансавых санкцый (OFSI), у якім гаварылася, што «пасля поўнага вывучэння інфармацыі OFSI ўстанавіла, што ў дачыненні да гэтага самалёта не было парушэнняў фінансавых санкцый».
Прыкладна ў той жа час у анлайн-дакумент FCDO з падрабязным апісаннем санкцый былі ўнесены папраўкі, у якіх былі выдалены падрабязнасці аб шасці самалётах.
Нягледзячы на гэта прадстаўнік брытанскага ўрада заявіў: «Вялікабрытанія і нашыя партнёры працягваюць аказваць ціск на рэжым Лукашэнкі і тых, хто яго падтрымлівае, у тым ліку праз жорсткія санкцыі. Нічога не змянілася, акрамя кіраўніцтва для прамысловасці і таго, як яно прадстаўлена. Гэта не ўплывае на дзеянне санкцыяў Вялікабрытаніі ў дачыненні да Беларусі — забарона застаецца ранейшай».
Па каментарыі таксама звярнуліся і ў Аэрапорт Лутон, аднак там адмовіліся абмяркоўваць, ці ведалі яны аб санкцыянаваным статусе P4-MSG і ці атрымлівалі якія-небудзь паведамленні ад уладаў Вялікабрытаніі наконт самалёта. Прэс-сакратар паведаміў, што ў аэрапорце дзейнічае палітыка ніколі не паведамляць падрабязнасці аб наведванні самалётаў.
Дапоўнена: Аказваецца сёння, 15 лютага, борт Міхаіла Гуцэрыева P4-MSG зноў прыляцеў у лонданскі аэрапорт Лутон з Шарамеццева, а іншы борт Гуцэрыева з рэгістрацыйным нумарам P4-GMS 11 лютага прыляцеў з Берліна ў Маскву праз 3,5 месяцы прастою.
