На русском языке:
Валерий Мацкевич назначен главой аппарата ОПК
Святлана Ціханоўская прызначыла на пасаду кіраўніка апарата Аб’яднанага Пераходнага Кабінета, палітыка, грамадскага дзеяча, былога намесніка старшыні «Маладога Фронту» — Валерыя Мацкевіча.
Мацкевіч быў каардынатарам мабілізацыйных кампаній падчас выбараў 2001, 2006, 2010 гадоў. У 2007 годзе балатаваўся ў мясцовыя саветы дэпутатаў. Падчас перадвыбарчай кампаніі 2020 году кіраваў адной са стратэгічна-аналітычных груп у аб’яднаным штабе Святланы Ціханоўскай. Адразу пасля выбараў прайшоў праз Жодзінскую турму і ізалятар на Акрэсціна.
«Перад Кабінетам як асноўным выканаўчым органам дэмакратычных сіл Беларусі стаіць вельмі адказная задача па рэалізацыі стратэгіі, якая мусіць забяспечыць набліжэнне транзіту ўлады ад злачыннага рэжыму да законнай і дэмакратычнай улады.
Кабінет фактычна ўсё больш выконвае ролю альтэрнатыўнага ўрада. І тут я кажу не толькі пра прадстаўнічую функцыю – пабудову высокаўзроўневых стасункаў на міжнародным полі, што безумоўна вельмі важна, але ў дадзеным выпадку найперш пра распрацоўку такіх глабальных і сацыяльна значных праектаў, як нацыянальны пашпарт, ці, напрыклад, інфармацыйна-кансультацыйная служба «Адно акно».
Як кіраўнік апарата я бачу сваёй асноўнай місіяй арганізацыю працы Кабінета як зладжанага механізму, які мае супольныя прыярытэты і адзіную мэту – незалежную дэмакратычную Беларусь без палітзняволеных і з легітымнай уладай», — пракаментаваў сваё прызначэнне Валерый Мацкевіч.
