In English:
Opinion. Artyom Shraibman on the telephone conversations of Borrell and Merkel with the official Minsk
На русском языке:
Мнение. Артем Шрайбман о телефонных разговорах Борреля и Меркель с официальным Минском
Палітычны аглядальнік Арцём Шрайбман у сваім тэлеграм-канале апублікаваў пост, у якім патлумачыў, што могуць значыць тэлефонныя размовы Меркель з Лукашэнкам і Барэля з Макеем. Прыводзім яго словы без зменаў.
Званкі Барэля і Меркель усё больш выглядаюць, як спроба даць Лукашэнку магчымасць самастойна дээскалаваць канфлікт, не страціўшы твар поўнасцю.
Тое, што Мінск літаральна і метафарычна ўпёрся ў сцяну, стала зразумела адразу пасля 8 лістапада, калі калона курдаў пайшла да мяжы.
Замест змякчэння, пазіцыя ЕС стала больш жорсткай, санкцыі сталі рыхтаваць хутчэй. Пра свае будучыя новыя санкцыі заявілі ЗША. А мігрантаў ніхто і не думаў прапускаць ці прымаць.
Лукашэнку трэба было знайсці шлях сысці з каляіны, так каб гэта не выглядала поўнай капітуляцыяй. Абмен сігналамі аб гатоўнасці гэта зрабіць прывёў да таго, што ў ЕС вырашылі дзеля гуманітарных меркаванняў даць яму такую магчымасць.
Прапаганда (і схільныя ўсюды бачыць здраду апаненты ўлады) абвясціла дыпламатычную перамогу. Уласна, дзеля гэтых захапленняў усё, здаецца, і задумлялася. Пацешцеся свайму прарыву, і дайце людзям спакойна з’ехаць дадому.
Пяты пакет гэтыя меры ўжо наўрад ці адменяць, а вось ад больш жорсткіх санкцыяў Мінск можа такім чынам уратавацца.
Казаць аб прызнанні Лукашэнкі тут, мякка кажучы, ранавата. Тое, што ён кантралюе сітуацыю ў Беларусі і лёсы людзей, якія апынуліся на яе тэрыторыі, увогуле не аспрэчвае нават штаб Ціханоўскай.
Захад выглядаў бы недарэчна, калі б ігнараваў гэтую рэальнасць. Як і ў выпадку з Афганістанам – дзеля вывазу людзей з Кабула прыйшлося весці дыялог з талібамі.
Еўрасаюз, калі і прызнаў Лукашэнку кімсьці, то хутчэй за чалавекам, які здольны сам ствараць праблемы ў рэгіёне і затым сам вырашаць гэтыя праблемы.
Дапускаю, што ў галовах некаторых людзей менавіта так і выглядае «легітымнасць» – падпаліць хлеў у сябе ў двары, папалохаць пажарам суседзяў і патушыць хлеў, калі табе патэлефанавалі.
