Новым старшынёй Беларускай рэспубліканскай калегіі адвакатаў (БРКА) стаў Аляксей Швакоў. Яго намеснікам абрана Алена Быліна. Такая інфармацыя паведамляецца на сайце БРКА.
Сёння, 14 лютага, стала вядома, што Віктар Чайчыц сышоў з пасады кіраўніка БРКА, якую ён займаў з 2011 года. Пра тое, што гэта можа адбыцца ў бліжэйшы час, нядаўна паведамляў адвакат Дзмітрый Лаеўскі. А сёння гэтую інфармацыю пацьвердзілі крыніцы выданьня Zerkalo.io. Перад выбарамі 2020 года менавіта Чайчыц заклікаў адвакатаў устрымацца ад заяваў аб тым, што «дрэнна працуе ўся сістэма» і «не паддавацца на правакацыі».
«Ён адыграў важную ролю ў тым, што адвакатура пазбавілася рэшткаў незалежнасці, а таксама ва ўхіленні з прафесіі шматлікіх добрых адвакатаў», — пісаў Лаеўскі.
Сёння стала вядома, што месца Чайчыца заняў экс-старшыня Мінскай калегіі адвакатаў Аляксей Швакоў. Для разумення, якіх поглядаў прытрымліваецца гэты чалавек, можна згадаць ягоныя цытаты на канферэнцыі МГКА, якая адбылася ў пачатку 2021 года. Тады, сярод іншага, Швакоў асуджаў адвакатаў, якія пасля выбараў 2020 года сталі займацца адміністрацыйнымі справамі.
«Калі ты ніколі не хадзіў і не займаўся адміністрацыйным працэсам, і не ведаеш як там адчыняюцца дзверы ў тым жа ІЧУ ці ізалятары следчым, так, навошта вы, там, пачынаеце, так бы мовіць, туды, прашу прабачэння за слова, біцца, так? Я вось часам там глядзеў некаторыя рэчы, там, якія адвакаты, там, бачыў, пісалі, так, ну гэта проста мяне здзівіла, ну людзі такія пытанні першапачаткова задавалі, што чалавек прыйшоў, а як там тэрмін абскарджання, што там рабіць, куды пісаць скаргу, а хто ўвогуле гэтым займаецца. Зразумела. Ну вось у нас, тым не менш, паддаўшыся такому ўсеагульнаму, так бы мовіць, назваць нават не ведаю, парыву, руху, многія адвакаты ў той перыяд, так, сталі займацца адміністрацыйнымі справамі», — казаў Швакоў.
Акрамя таго, Швакоў раіў адвакатам, якія абараняюць палітвязняў быць «чым цішэй, тым лепш», а свабоду слова ён называў «моднай тэмай». А пра калектыўныя звароты адвакатаў ён казаў, што шмат адвакатаў не да канца разумелі пад чым падпісваюцца.
«У нас шмат тут зараз кажуць “свабода слова”, “кажу, што хачу” і гэтак далей, так бы мовіць, нельга забараняць нічога. Ну, такая, модная тэма», – казаў Швакоў.
Па словах праваабаронцаў, старшыня Мінскай калегіі адвакатаў ужо тады сваімі бязвольнымі і кан’юнктурным выступам пасылаў сігнал сваім жа калегам: «замоўкніце, змірыцеся, вы толькі шрубка ў сістэме».
In English:
Alexey Shvakov is the new chairman of the National Bar Association: we tell you who he is by his own quotes
На русском языке:
Новым председателем БРКА стал Алексей Шваков: рассказываем, кто он такой его же цитатами
