На русском языке:
После призыва Франции покинуть Беларусь ряд телеграм-каналов начали писать, что «немедленно покинуть РБ» требуют и Канада, и посольство Бразилии
Сёння з’явілася паведамленне пра тое, што Францыя рэкамендуе сваім грамадзянам устрымацца ад паездак у Беларусь, а лепей увогуле пакінуць краіну.
Пасля гэтага шэраг тэлеграм-каналаў пачаў разганяць навіну пра тое, што нібыта амбасада Бразіліі і Канада заклікалі неадкладна пакінуць Беларусь.
Праўда ў тым, што мы не знайшлі пацверджанняў, што невядомая амбасада Бразіліі заклікала грамадзян пакінуць Беларусь. Проста дзясяткі каналаў пішуць адно і тое ж, не спасылаючыся на афіцыйныя крыніцы Бразільскага ўрада.
Цяпер пра Канаду. Многія каналы пішуць тэксты ў духу: «Канада ўслед за Францыяй і Бразіліяй заклікала сваіх грамадзян неадкладна пакінуць Беларусь».
Пытанне: а вы ўвогуле адкрывалі сайт МЗС Канады?
Так, там зʼявілася рэкамендацыя пазбягаць усіх паездак. Але, па-першае, яна зʼявілася яшчэ 10 лютага. Па-другое, там сказана, што прычына ў закрыцці памежнага пераходу «Баброўнікі» (Бераставіца). Па-трэцяе, там няма фразы «неадкладна пакінуць».
З гэтым разабраліся, далей Германія. МЗС Германіі сапраўды 13 лютага абнавіў сваю рэкамендацыю, выдадзеную 3 сакавіка 2022 года пасля пачатку расійскага ўварвання ва Украіну, з перасцярогай ад наведвання Беларусі.
Сайт МЗС Германіі перасцерагае ад паездак у Беларусь (старонка перакладзена)
І там таксама сказана, што прычына абнаўлення рэкамендацый у закрыцці пункта пропуску «Баброўнікі» (Бераставіца). А паколькі паветраныя зносіны паміж Беларуссю і краінамі ЕС спыненыя, то для замежнікаў (і для беларусаў), якія хочуць выехаць у Польшчу, застаецца толькі адно «акно» – праз пункт пропуску «Брэст-Цярэспаль», у якім зараз назіраецца напружаная абстаноўка.
Таксама можна згадаць, што і МЗС Італіі абнавіў свае рэкамендацыі і адразу напісаў: «На дадзены момант сітуацыя з бяспекай у Беларусі не носіць асабліва крытычнага характару». Італьянцам рэкамендуецца ўстрымацца ад паездак у Беларусь.
Вось і ўсё! Заўсёды, правярайце інфармацыю.
