In English:
Lithuania continues to issue visas for those who are in danger in Belarus, but only one consul does it because of the requirements of Makei’s Foreign Ministry
На русском языке:
Литва продолжает выдавать визы для тех, кому грозит опасность в Беларуси, но делает это всего один консул из-за требований МИДа Макея
Літоўскае выданне LRT са спасылкай на МЗС Літвы, якое ўзначальвае Габрыэлюс Ландсбергіс, паведамляе, што, нягледзячы на ўвядзенне надзвычайнага становішча, Літва працягне выдаваць візы грамадзянам Беларусі ў выпадках, калі выдача віз ажыццяўляецца пры пасярэдніцтве Міністэрства замежных спраў Літвы.
«Пасля падзеяў у жніўні 2020 года ў Мінску Вільня стала найважнейшым цэнтрам дзейнасці беларускай грамадзянскай супольнасці. Дзесяткі беларускіх НКА і арганізацый грамадзянскай супольнасці, актывісты і незалежныя журналісты, якія не могуць працаваць у Беларусі, размясціліся ў Літве, таму прагучаўшыя апошнім часам у публічнай прасторы абвінавачання ў тым, што людзі, якія ратуюцца ад таталітарных рэжымаў, не могуць патрапіць у Літву, не адпавядаюць рэчаіснасці», – паведамляе МЗС Літвы ў сваім прэс-рэлізе.
Нягледзячы на скарачэнне штата пасольства Літвы ў Беларусі да 1 супрацоўніка па аднабаковым патрабаванні рэжыму Лукашэнкі і закрыццё Генеральнага консульства ў Гродне, што істотна абмяжоўвае магчымасці выдачы віз беларусам, а таксама ўвядзенне надзвычайнага становішча ў Літве з 1 сакавіка 2022 года, Літва дала магчымасць прадстаўнікам беларускіх сіл і СМІ прыязджаць у Літву дзякуючы выключэнню, прадугледжанаму пастановай Сейма аб увядзенні надзвычайнага становішча.
МЗС Літвы таксама паведамляе, што сур’ёзна ставіцца да ўсіх пададзеных запытаў, правярае іх і выступае пасярэднікам толькі ў тых выпадках, калі запыты абгрунтаваныя.
«Міністэрства замежных спраў будзе і надалей прыкладаць усе намаганні для таго, каб Беларусь, якая імкнецца да свабоды, заставалася на парадку дня як літоўскай, так і міжнароднай палітыкі, а людзі, якія змагаюцца супраць рэжыму, маглі на законных падставах прыязджаць і пражываць у Літве», – гаворыцца ў заяве.
