In English:
Opinion. Yahor Lebiadok on the deployment of nuclear weapons in Belarus
На русском языке:
Мнение. Егор Лебедок о размещении ядерного оружия в Беларуси
Аглядальнік Ягор Лебядок у сваім тэлеграм-канале апублікаваў пост, у якім аналізуе прапанову Лукашэнкі аб вяртанні ядзернай зброі ў Беларусь. Прыводзім яго словы без зменаў.
А.Р. Лукашэнка заявіў, што ў выпадку размяшчэння ядзернай зброі ў Польшчы ён прапануе Пуціну вярнуць ядзерную зброю ў Беларусь. Гэта быў адказ на заяву генеральнага сакратара НАТА Й. Столтэнберга. 19 лістапада 2021 года ў кантэксце змены кіраўніцтва Германіі, у якой размяшчаецца асноўны ядзерны арсенал НАТА ў Еўропе, ён паведаміў: вядома, Германія можа вырашаць — ці будзе ў яе ядзерная зброя, але альтэрнатыва ў тым, што ядзерная зброя апынецца ў іншых краінах Еўропы, таксама на ўсход ад Германіі.
У Расіі варыянтаў размяшчэння тактычнай ядзернай зброі ў Беларусі істотна больш, чым у НАТА ў Еўропе, дзе размешчаны толькі ядзерныя авіябомбы B61 (паводле адкрытай інфармацыі), у той час як у РФ ёсць магчымасць размяшчэння ядзерных бомб, аператыўна-тактычных ракетных комплексаў з ЯЗ, а таксама ядзерных боепрыпасаў для артылерыі і нават ядзерных мін. Тым самым магчымасцяў хуткага ўжывання ЯЗ у РФ прыкметна больш на нашым ТВД, чым у НАТА: самалёты адсочвае СПА, а вось, напрыклад, артылерыю з ЯЗ хоць і можна адсочваць, але зразумець у якой прыладзе ядзерны боепрыпас — складаней. Уся самаходная артылерыя, здольная да ўжывання ЯЗ (напрыклад, САУ 2с3) у такім разе павінна ўспрымацца як патэнцыйны носьбіт ЯЗ, а значыць трэба істотна нарошчваць выведвальныя магчымасці (якія потым прапаганда будзе падаваць як недружалюбныя дзеянні Захаду па падрыхтоўцы да вайны).
Натуральна, гаворка не ідзе пра перадачу Расіяй ядзернай зброі Беларусі — гэта парушэнне дамовы аб нераспаўсюджванні ЯЗ і мела б наступствы для самой РФ і бяспекі ў свеце. ЯЗ, у выпадку размяшчэння ў Беларусі, будзе пад кіраўніцтвам Расіі, г.зн. Беларусь рэальна ніяк на яе ўжыванне не паўплывае, як тое было ў перыяд пасля распаду СССР і да распаду таксама. Размяшчэнне тактычнай ЯЗ у Беларусі робіць нашу тэрыторыю адной з асноўных мэт для нанясення ўдару рознымі сіламі і сродкамі ў выпадку вайны з Расіяй, нават пры дыстанцыяванні Беларусі ад вайны. Тут дарэчна ўспомніць словы камандуючага Беларускай ваеннай акругай А.І. Касценкі ў 1991 годзе ў дыскусіі аб мэтазгоднасці ЯЗ ў Беларусі: «Ва ўмовах абарончай дактрыны, абараняючыся ў межах рэспублікі, мы, магчыма, па планах павінны былі прымяняць такую [ядзерную] зброю. З пачаткам вайны плануецца ўжыванне гэтай зброі — гэта не проста дзясяткі чарнобыляў на зямлі, не толькі вывад з актыву матэрыяльнай асновы вялізных жыццёвых прастор, але і падрыў або разбурэнне генафонду нацыі да цяжкаўзнаўляльнага ўзроўню, і ніякія рашучыя мэты вайны не вартыя такой задачы».
Патрэбы размяшчэння ў Беларусі ЯЗ для РФ у кантэксце супрацьдзеяння Польшчы асабліва няма. З верасня 2020 года расіяне трэніруюць ракетна-бомбавыя ўдары стратэгічнымі бамбавікамі з паветранай прасторы Беларусі па сумежных з намі краінах. Збольшага для забеспячэння большай надзейнасці нанясення ўдару ідзе нарошчванне СПА ў Беларусі, размяшчэнне расійскага С-400 і інш.
Заяву «Я як руплівы гаспадар нічога не разбурыў [інфраструктуру для ядзернай зброі, якая засталася з часоў СССР], усе адрыны стаяць на месцы» кожны можа праверыць асабіста, прагуляўшыся па рамонтна-тэхнічных базах былога СССР, каб убачыць, наколькі яны адрозніваюцца ад адрын. У рэальнасці інфраструктура запатрабуе сур’ёзных затрат часу і сродкаў. Як і абсталяванне такіх баз у Польшчы.
28 лістапада 2021 года Й. Столтэнберг адносна сваёй заявы ад 19 лістапада паведаміў: «Германія будзе працягваць удзельнічаць у сумесным выкарыстанні ядзерных узбраенняў, і таму гэта больш не праблема». Таму заява Лукашэнкі як мінімум запозненая. Асабліва характэрна, што 30 лістапада АДКБ, куды ўваходзіць і Беларусь, заявіла: «Дзяржавы-сябры АДКБ настойліва заклікаюць дзяржавы-ўдзельніцы Дамовы аб нераспаўсюджанні ядзернай зброі, якія валодаюць ядзернай зброяй, абмежавацца яе дыслакацыяй на сваіх тэрыторыях без яе размяшчэнн за мяжой і ліквідаваць усю інфраструктуру, якая дазваляе забяспечыць хуткае разгортванне гэтай зброі на тэрыторыі няядзерных дзяржаў».
